قازاقستاندىق جاستاردىڭ 70 پايىزدان استامى مەملەكەتتىك تىلدە ەركىن سويلەيدى
ساۋالناماعا قاتىسۋشىلارعا مەملەكەتتىك ءتىلدى مەڭگەرۋ دەڭگەيىنە قاتىستى بىرنەشە جاۋاپ نۇسقالارى ۇسىنىلدى.
ساۋالناما ناتيجەسى جاستاردىڭ 77.7% قازاق تىلىندە ەركىن سويلەيتىنىن، 10.3 % اۋىزەكى سويلەۋ دەڭگەيىندە بىلەتىنىن كورسەتتى، 5 % «تۇسىنەمىن، ءبىراق سويلەي المايمىن» - دەپ جاۋاپ بەرسە، 3.7 % «بىرنەشە سوزدەردى عانا بىلەمىن، ءجاي سويلەمدەردى تۇسىنەمىن» - دەگەن، ال 1.6 % قازاق ءتىلىن مۇلدەم بىلمەيمىن دەسە، 1.7 % «بىلمەيمىن، ءبىراق ۇيرەنۋدى باستايمىن» - دەگەن نۇسقاسىن تاڭداعان.
الەۋمەتتىك ساۋالنامانىڭ قورىتىندىسى قازاقستاندىق جاستاردىڭ 70 پايىزدان استامى مەملەكەتتىك ءتىلدى جەتىك مەڭگەرگەنىن كورسەتەدى.
ساۋالناماعا ەلىمىزدىڭ بارلىق ايماقتارىنان 5 مىڭعا جۋىق 18 دەن 30 جاسقا دەيىنگى جاستار قاتىستى.
بيىل ەلىمىزدە قازاق تىلىنە مەملەكەتتىك ءتىل مارتەبەسىن بەرگەن «ءتىل تۋرالى» زاڭنىڭ قابىلدانعانىنا جيىرما بەس جىل تولادى.
قازاق ءتىلىنىڭ قولدانىس اياسىن كەڭەيتۋ ماسەلەسى تاۋەلسىزدىگىمىزدىڭ العاشقى كۇندەرىنەن كۇن تارتىبىنەن تۇسپەي كەلەدى. بۇگىنگى تاڭدا قازاق ءتىلى جاستار اراسىندا كۇندەلىكتى قارىم- قاتىناس تىلىنە اينالدى. ەلىمىزدىڭ 60 پايىزدان استام وقۋشىلارى مەملەكەتتىك تىلدە ءبىلىم الۋدا.
ەستەرىڭىزدە بولسا، www.soyle.kz پورتالى قازاق ءتىلىن تەگىن ۇيرەتۋ ماقساتىندا وتكەن جىلدىڭ اياعىندا اشىلعان بولاتىن. اشىلعالى بەرى بەس ايدىڭ ىشىندە وسى پورتالدا تىركەلگەن قازاق ءتىلىن ۇيرەنۋشىلەر سانى 9 مىڭعا جەتىپ، پورتالمەن ەلىمىزدىڭ بارلىق ايماقتارى مەن مەن شەت ەلدەردەن 80 مىڭعا جۋىق ادام كىرىپ تانىستى، دەپ حابارلايدى مەملەكەتتىك ءتىلدى دامىتۋ قورىنىڭ باسپا ءسوز قىزمەتى.
