الماتى وبلىسىندا جاپپاي تارتىپسىزدىككە قاتىسى بار دەگەن كۇدىكپەن 700 ادام ۇستالدى

الماتى وبلىسىنىڭ باس پوليتسەيى، پوليتسيا گەنەرال- مايورى سەرىك كۋدەبايەۆ وبلىسىمىزدىڭ اۋماعىندا جاپپاي تارتىپسىزدىكتىڭ، دۇنيە- مۇلىكتى قيراتۋ مەن توناۋ ورىن العانىن ايتىپ، قىلمىستىق ارەكەتتەرگە قاتىسى بار ادامداردىڭ انىقتالىپ جاتقانىن جەتكىزدى.

«جاپپاي تارتىپسىزدىككە جانە دۇنيە- مۇلىكتى توناۋ قىلمىستارىنا قاتىسى بار دەگەن كۇدىكپەن جەتى جۇزدەن استام ادام پوليتسيا ورگاندارىنا جەتكىزىلدى. ونىڭ 62- ءسى ۋاقىتشا ۇستاۋ يزولياتورىنا قاماققا الىندى. دەرەك بويىنشا 65 قىلمىستىق ءىس قوزعالدى. ارنايى وپەراتسيا بارىسىندا قىلمىسكەردەردەن جۇزگە جۋىق اتىس قارۋى تاركىلەندى. وسى باعىتتاعى ماقساتتى جۇمىس ودان ءارى جالعاسىپ جاتىر»، - دەدى وبلىستىق پ د باستىعى سەرىك كۋدەبايەۆ.

ەستەرىڭىزگە سالا كەتەيىك، قاڭتار ايىنىڭ باسىندا راديكالدى كۇشتەر ەلىمىزدەگى جاعدايدى تۇراقسىزداندىرۋعا تىرىسقان. الماتى وبلىسىنىڭ ورتالىعى تالدىقورعان قالاسىنداعى كەيبىر دۇكەندەر تونالىپ، اكىمشىلىك عيماراتتار بۇلىنگەن. قۇقىقتىق ءتارتىپتى قامتاماسىز ەتۋ بويىنشا قىزمەتتىك بورىشىن اتقارۋ كەزىندە پوليتسەيلەر مەن ۇلتتىق گۆارديانىڭ اسكەري قىزمەتشىسى قازا تاپتى.

«وبلىستىق پوليتسيا دەپارتامەنتى مەن تالدىقورعان قالالىق پوليتسيا باسقارماسى قىزمەتكەرلەرىنىڭ 80 پايىزعا جۋىعى ءارتۇرلى دەنە جاراقاتىن الدى. ولاردىڭ ءبارى ءوز ءومىرىن قاتەرگە تىگىپ، قاسيەتتى انتىنا ادال ەكەنىن دالەلدەپ، ەل تىنىشتىعىن قورعاۋدا تاباندىلىق پەن ەرلىك مىنەز تانىتتى»، - دەپ تولىقتىردى گەنەرال- مايور س. كۋدەبايەۆ.

قازىرگى ۋاقىتتا وبلىستاعى جاعدايدى پوليتسەيلەر مەن اسكەريلەر تولىق باقىلاۋعا العان. تالدىقورعان قالاسىنىڭ جان- جاعىنا 4 بلوكپوست، ال قالا ىشىنە بىرنەشە جەرگە بلوكبەكەتتەر قويىلعان. ول جەرلەردە پوليتسەيلەر مەن اسكەري قىزمەتشىلەر تاۋلىك بويى كەزەكشىلىك اتقارۋدا. پوليتسيا باسشىسىنىڭ اقپاراتىنا سايكەس، وبلىس ورتالىعىنىڭ كوشەلەرىندە 35 پوليتسيا كولىگى ۇزدىكسىز اۆتوپاترۋلدەيدى. كۇندىز ءتارتىپ ساقشىلارى مەن ۇلتتىق ۇلان ساربازدارىنان قۇرىلعان 20 جاساق جاياۋ پاترۋلدەپ ءجۇر.

اۆتور: سامال قابىشيەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى