كيىك اتقاندار 700 ميلليون تەڭگە شىعىن كەلتىردى

بۇل تۋرالى ق ر ىشكى ىستەر مينيسترلىگىنىڭ رەسمي وكىلى ءنۇردىلدا وراز ايتىپ بەردى، دەپ حابارلايدى قازاقپارات ءتىلشىسى.

«ءىءى م كريمينالدىق پوليتسيا دەپارتامەنتى باتىس قازاقستان وبلىسىنىڭ پوليتسەيلەرىمەن بىرلەسىپ، كيىكتەردى زاڭسىز اۋلاپ، مۇيىزدەرىن ساتۋمەن اينالىسقان ەكى قىلمىستىق توپتى ۇستادى. بۇل توپتاردىڭ 11 مۇشەسى قىلمىستىق جاۋاپقا تارتىلادى. ولار وتكەن جىلدىڭ قىركۇيەك ايىنان بەرى وبلىس اۋماعىندا براكونەرلىكپەن اينالىسقان»، - دەدى رەسمي وكىل مينيسترلىك ۇيىمداستىرعان بريفينگتە.

تەرگەۋ بارىسىندا 700 دەن استام كيىك ءمۇيىزى، 9 اتىس قارۋى، 7 اۆتوكولىك، 2 قاردا جۇرەتىن كولىك جانە 2 موتوسيكل تاركىلەنگەن. كيىكتەردى اتۋ سالدارىنان ەكولوگياعا 700 ميلليون تەڭگەدەن استام شىعىن كەلگەن.

«اتالعان فاكتىلەر بويىنشا سوتقا دەيىنگى تەرگەۋ امالدارى ءجۇرىپ جاتىر. ايتا كەتەيىك، جىل باسىنان بەرى ىشكى ورگاندار تابيعات قورعاۋ زاڭناماسىن بۇزعان 12,5 مىڭ فاكتىنى انىقتادى. سوتقا دەيىنگى 583 تەرگەۋ باستالدى، ونىڭ ىشىندە 221 قىلمىستىق ءىس سوتقا جولداندى. 12 مىڭعا جۋىق قۇقىق بۇزۋشى اكىمشىلىك جاۋاپقا تارتىلدى»، - دەدى ن. وراز.

ەسكە سالساق، ب ق و- دا زاڭسىز كيىك اۋلاۋمەن اينالىسقان ەكى قىلمىستىق توپ ۇستالعانى تۋرالى حابارلاعان بولاتىنبىز.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى