قازاقستاندا 70 كە جۋىق كوشە مەن 18 وقۋ ورنىنىڭ اتاۋى وزگەرەدى
ۇلتتىق مۋزەيدە پارلامەنت دەپۋتاتتارىنىڭ، مينيسترلىك وكىلدەرىنىڭ، عالىمدار مەن جازۋشىلاردىڭ قاتىسۋىمەن رەسپۋبليكالىق ونوماستيكا كوميسسياسىنىڭ وتىرىسى ءوتتى.
كەزدەسۋدە قازاقستاننىڭ وڭىرلەرىندەگى 18 وقۋ ورنىن جانە كوكشەتاۋ، قوسشى، ستەپنوگور (اقمولا وبلىسى) ارىس (تۇركىستان وبلىسى) جانە تالدىقورعان (جەتىسۋ وبلىسى) قالالارىنداعى 69 كوشەنىڭ اتاۋىن وزگەرتۋ ماسەلەسى تالقىلاندى.
وتىرىس قورىتىندىسى بويىنشا وڭتۇستىك قازاقستان پەداگوگيكالىق ۋنيۆەرسيتەتىنە كورنەكتى مەملەكەت جانە قوعام قايراتكەرى، عالىم-ەتنوگراف، تاريحشى، اكادەميك وزبەكالى جانىبەكوۆتىڭ ەسىمىن بەرۋ تۋرالى شەشىم قابىلداندى.
اقتاۋ قالاسىنداعى 28№ جالپى ورتا مەكتەپكە ۇلى اعارتۋشى، عالىم، اقىن جانە پۋبليتسيست احمەت بايتۇرسىن ۇلىنىڭ ەسىمى بەرىلدى.
«ۇلت ۇستازىنىڭ» ەسىمىمەن قوستاناي اۋدانىنىڭ ءبىلىم ءبولىمىنىڭ مەملەكەتتىك تىلدە وقىتاتىن زارەچنايا جالپى ءبىلىم بەرەتىن مەكتەبى، سونداي-اق جەتىسۋ وبلىسى الاكول اۋدانىنىڭ ءۇشارال قالاسىنىڭ 1№ ورتا مەكتەبى اتالادى.
قوستاناي اۋدانىنىڭ ءبىلىم ءبولىمىنىڭ سوۆحوز جالپى ءبىلىم بەرەتىن مەكتەپ اتاۋى كورنەكتى جازۋشى، اقىن جانە قوعام قايراتكەرى سپانديار كوبەيەۆتىڭ قۇرمەتىنە وزگەرتىلەدى.
جەتىسۋ وبلىسى الاكول اۋدانى ءۇشارال قالاسىنىڭ 2№ ورتا مەكتەبى قازاق ادەبيەتىنىڭ كلاسسيگى، اقىن، جازۋشى، دراماتۋرگ جانە جۋرناليست ءىلياس جانسۇگىروۆتىڭ ەسىمىمەن اتالادى.
جەتىسۋ وبلىسى الاكول اۋدانى بەسكول ستانتسياسىنىڭ 14№ ورتا مەكتەبى اتاۋى الەمگە ايگىلى قازاق جازۋشىسى مۇحتار اۋەزوۆتىڭ قۇرمەتىنە وزگەرتىلەدى.
جەتىسۋ وبلىسى الاكول اۋدانى دوستىق كەنتىنىڭ №11 ورتا مەكتەبى كەڭەس وداعىنىڭ باتىرى جانە مايدانگەر-جازۋشى باۋىرجان مومىش ۇلىنىڭ ەسىمىمەن اتالادى.
جەتىسۋ وبلىسىنداعى ءۇشارال قازاق گيمنازياسىنا ۇلى اعارتۋشى جانە پەداگوگ ىبىراي التىنساريننىڭ ەسىمى بەرىلەدى.
«يدەولوگيالىق تۇرعىدا ەسكىرگەن، قايتالاناتىن اتاۋلارى بار كوشەلەر مەن باسقا دا ورىندارعا كەلەتىن بولساق، كوكشەتاۋ قالاسىندا «ريەۆوليۋتسيا ءۇشىن كۇرەسكەرلەرگە ارنالعان ساياباق» «الاش ارىستارى» دەپ وزگەرتىلىپ، دميترييەۆ كوشەسى اتى اڭىزعا اينالعان داۋلەتكەرەي كۇيشىنىڭ قۇرمەتىنە وزگەرەدى. اقمولا وبلىسىنىڭ قوسشى قالاسىنداعى 20-شاعىن اۋداننىڭ بىرنەشە كوشەسىنە امىرە قاشاۋبايەۆ، جاھانشا دوسمۇحامەدوۆ، نۇرعيسا تىلەنديەۆ، جۇمەكەن ناجىمەدەنوۆ، روزا باعلانوۆا، شوقىر بولتەك ۇلى، ساعادات نۇرماعامبەتوۆ، ءابىش كەكىلبايەۆ، فاريزا وڭعارسىنوۆا، باتىرحان شوكەنوۆ سياقتى قايراتكەر تۇلعالاردىڭ ەسىمى بەرىلدى. ستەپنوگور قالاسىندا پاركوۆايا جانە ستەپنايا كوشەلەرى اتى اڭىزعا اينالعان پالۋان قاجىمۇقان مەن كەڭەس وداعىنىڭ باتىرى مانشۇك مامەتوۆانىڭ قۇرمەتىنە وزگەرتىلەدى. سول سياقتى تالدىقورعان قالاسىنىڭ بىرنەشە كوشەسىنە قازاق حاندىعىنىڭ نەگىزىن قالاۋشى كەرەي مەن جانىبەك حانداردىڭ، تۇمانباي مولداعاليەۆ، ساعادات نۇرماعانبەتوۆ سياقتى تۇلعالاردىڭ ەسىمى بەرىلدى»، - دەپ جازادى مينيستر اسحات ورالوۆ Telegram پاراقشاسىنا.
تۇركىستان وبلىسىنىڭ ارىس قالاسىندا روزا باعلانوۆانىڭ، قازاقستاننىڭ حالىق جازۋشىسى شەرحان مۇرتازانىڭ جانە ءارتۇرلى گەوگرافيالىق ورىنداردىڭ: شارىن، سارىارقا، ۇلىتاۋ، جيدەباي، سارايشىق جانە ت. ب. اتىنداعى كوشەلەر پايدا بولادى.
اتاۋلاردىڭ ءبىر بولىگى قايتا قاراۋعا باعىتتالعان. بۇل «گۇلدەر»، «اسۋ»، «تىرشىلىك» جانە «اينالايىن».
وتىرىسقا قاتىسۋشىلار كوشە اتاۋلارى ءوڭىردىڭ تاريحي جانە گەوگرافيالىق ەرەكشەلىكتەرىن كورسەتىپ، ناقتى ماعىناعا يە بولۋى كەرەك دەگەن پىكىرگە كەلدى.
جاقىندا تۇركىستاندا وتكەن ۇلتتىق قۇرىلتايدىڭ II وتىرىسىندا مەملەكەت باسشىسى قاسىم-جومارت توقايەۆ ءومىربايانى بىرەۋدىڭ جەكە مۇددەسى مەن قالاۋى ءۇشىن ماقساتتى تۇردە ميفولوگيالانعان كەڭەستىك قايراتكەرلەردىڭ ەسىمىن ءارتۇرلى نىساندارعا بەرۋ تاجىريبەسىن توقتاتۋ كەرەكتىگىن ايتتى.
پرەزيدەنت ونوماستيكا سالاسىندا ءتارتىپ ورناتۋدى جانە وڭىرلىك ەرەكشەلىكتەردى دە، جالپىۇلتتىق باسىمدىقتاردى دا ەسكەرە وتىرىپ، بارلىق ءراسىمدى رەگلامەنتتەۋدى تاپسىرعان بولاتىن.
ءدال وسى ماقساتتا مادەنيەت جانە سپورت مينيسترلىگى كورنەكتى قايراتكەرلەر مەن تاريحي تۇلعالاردىڭ «تاريحي تۇلعالار» ءتىزىمىن وزەكتەندىرۋ بويىنشا جۇمىس جۇرگىزىپ جاتىر.
سونىڭ نەگىزىندە نىساندار مەن كوشەلەرگە جاڭا اتاۋ بەرىلەدى.
قازىرگى ۋاقىتتا كوميسسياعا 681 ۇسىنىس ءتۇستى.
ولاردى جەرگىلىكتى ونوماستيكالىق كوميسسيالاردىڭ قاراۋىنا اكىمدىكتەرگە جىبەرۋ تۋرالى شەشىم قابىلداندى.
مادەنيەت كوميتەتىنە ادىستەمەلىك ۇسىنىمدارعا قاجەتتى وزگەرىستەر ەنگىزۋ جونىندە تاپسىرمالار بەرىلەدى.
