الماتى- وسكەمەن- لەپسى- اقتوعاي اۆتوجولىن جاڭارتۋدى اياقتاۋ ءۇشىن 7,4 ميلليارد تەڭگە قاجەت
بۇل تۋرالى جەتىسۋ وبلىسىنىڭ اكىمى بەيبىت يسابايەۆ وڭىرگە جۇمىس ساپارىمەن كەلگەن سەنات جانە ءماجىلىس دەپۋتاتتارىمەن كەزدەسۋىندە ايتتى، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.
«مەملەكەت باسشىسى بىلتىرعى وبلىسىمىزعا جۇمىس ساپارى بارىسىندا كەلەسى ەكى جىل ىشىندە «لەپسى - بالقاش» اۆتوجولىنىڭ قۇرىلىسىن اياقتاۋ جونىندە تاپسىرما بەردى. اۆتوجولدىڭ جالپى ۇزىندىعى - 141 شاقىرىم، بۇگىنگە ونىڭ 39 شاقىرىمى جوندەلدى. ىسكە اسىرۋ ساتىسىندا ەكى جوبا بار: «لەپسى - بالقاش كولى» 0-27 شاقىرىمى جانە «الماتى- وسكەمەن- لەپسى- اقتوعاي» جولىنىڭ 35-110 شاقىرىمى. ەكى جوبانىڭ جالپى قۇنى - 17,7 ميلليارد تەڭگە، 9,5 ميلليارد تەڭگە ءبولىندى، ونىڭ ىشىندە 2023 -جىلعا - 2,9 ميلليارد تەڭگە. «الماتى- وسكەمەن- لەپسى- اقتوعاي» اۆتوجولىنىڭ 35-110 شاقىرىمىن قايتا جاڭارتۋدى اياقتاۋ ءۇشىن 7,4 ميلليارد تەڭگە قاجەت. يندۋستريا جانە ينفراقۇرىلىمدىق دامۋ مينيسترلىگى 2023 -جىلعا ءوتىنىم بەرىلگەن سومانىڭ 2,5 ميلليارد تەڭگەسىن قولدادى جانە قارجى كۇزدە رەسپۋبليكالىق بيۋدجەتتى تۇزەتۋ كەزىندە بولىنبەكشى. سىزدەردەن 2023 -جىلعى رەسپۋبليكالىق بيۋدجەتتى ناقتىلاۋ كەزىندە جانە 2024-2026 -جىلدارعا ارنالعان رەسپۋبليكالىق بيۋدجەتتى قاراۋ كەزىندە قۇرىلىستى اياقتاۋ ءۇشىن قاراجات بولۋگە جاردەم كورسەتۋدى سۇرايمىز»، - دەدى بەيبىت يسابايەۆ.
بەيبىت وكسىكباي ۇلى دەپۋتاتتاردىڭ نازارىن جوبا قۇنىنىڭ قىمباتتاۋىنا اۋداردى.
«جاڭا بيۋدجەت كودەكسىنىڭ جوباسىن قاراۋ كەزىندە قۇرىلىستىڭ نورماتيۆتىك مەرزىمدەرىن ساقتاماۋعا، ۇلتتىق ۆاليۋتا باعامىنىڭ ەلەۋلى وزگەرۋىنە جانە قۇرىلىس ماتەريالدارى قۇنىنىڭ قىمباتتاۋىنا بايلانىستى جوبانىڭ سمەتالىق قۇنى ۇلعايعان جاعدايدا رەسپۋبليكالىق بيۋدجەتتەن قارجىلاندىرۋ نورماسىن قوسۋ ورىندى دەپ سانايمىز. مىسالى، «الماتى - وسكەمەن - لەپسى - اقتوعاي» اۆتوجولىن قايتا جاڭارتۋ» جوباسىن ىسكە اسىرۋ 2018 -جىلى باستالدى، ياعني التىنشى جىل قاتارىنان ىسكە اسىرىلىپ كەلەدى. قۇرىلىستىڭ نورماتيۆتىك مەرزىمى - 2,5 جىل. وسى ۋاقىت ىشىندە قۇرىلىس ماتەريالدارىنىڭ قۇنى 2 ەسە ءوستى»، - دەدى ول.
ايتا كەتسەك، ايماقتا اۋىلدىق ەلدى مەكەندەردە كارىز جەلىسىن سالۋ جۇمىسى دا وزەكتى بولىپ تۇر. سونداي- اق، دەنساۋلىق ساقتاۋ سالاسىنداعى ءىرى جوبالاردى ىسكە اسىرۋ، الاكول كولىنىڭ جاعاسىن بەكىتۋ، اقشي جانە كوكتۇما اۋىلدارىنا دەيىن جوعارى ۆولتتى ەلەكتر بەرۋ جەلىلەرىنىڭ قۇرىلىسى بۇگىنگى كۇننىڭ باستى تالابىنا اينالدى. بۇل ماسەلەلەر وڭ شەشىمىن تاباتىن بولسا، وبلىستاعى تۋريزم سالاسىنىڭ وركەندەۋىنە جول اشادى.
جالپى، كەزدەسۋگە قاتىسۋشىلار وبلىستىڭ دامۋىنا قاتىستى كوپتەگەن ۇسىنىستارىن جەتكىزدى. سونىڭ ىشىندە اۋىل شارۋاشىلىعى سالاسىنداعى مەملەكەتتىك ساتىپ الۋ، ازىق- تۇلىك قاۋىپسىزدىگىن قامتاماسىز ەتۋ، سۋبسيديالاۋ قاعيدالارى، ينۆەستيتسيالىق جوبالاردى جەتىلدىرۋ، جايىلىمداردىڭ جەتىسپەۋشىلىگىن جويۋ، حالىقتىڭ تالاپ- تىلەگىنە قۇلاق اسۋ سىندى باستامالار ايتىلدى.
پارلامەنتى سەناتى مەن ءماجىلىسىنىڭ دەپۋتاتتارى جەتىسۋ وبلىسىندا بىرنەشە كۇن جۇمىس ساپارىمەن بولادى. ەسكەلدى، قاراتال، اقسۋ، سارقان، الاكول اۋداندارى مەن تالدىقورعان، تەكەلى قالالارىندا جەرگىلىكتى ءماسليحات دەپۋتاتتارىمەن بىرلەسىپ، ءوندىرىس ورىندارىن، الەۋمەتتىك نىسانداردى ارالايدى جانە كوتەرىلگەن وزەكتى ماسەلەلەردى تالقىلايدى.
