قازاقستاننىڭ سىرتقى ساۋدا اينالىمى 7,4 پايىزعا تومەندەدى
بۇل تۋرالى ساۋدا جانە ينتەگراتسيا ءمينيسترى باقىت سۇلتانوۆ ايتتى، دەپ حابارلايدى قازاقپارات ءتىلشىسى.
«الەمدەگى ساۋدانىڭ جالپىلاي تەجەلۋى تۇرعىسىندا قازاقستاننىڭ سىرتقى ساۋدا اينالىمى ءبىرىنشى جارتىجىلدىق قورىتىندىسى بويىنشا 7,4 پايىزعا تومەندەدى»، - دەدى مينيستر ونلاين رەجيمدە حالىق الدىندا ەسەپ بەرۋى بارىسىندا.
ونىڭ سوزىنە قاراعاندا، ەۋرازيالىق ەكونوميكالىق وداق اياسىندا سىرتقى ساۋدا اينالىمى 10 پايىزعا تومەندەدى.
«باسقا دا وڭىرلىك بىرلەستىكتەردە ساۋدا قاتىسۋشى ەلدەردىڭ ەكونوميكالىق بەلسەندىگىنىڭ باستى ىنتالاندىرۋشىسى بولىپ وتىر. سوندىقتان ساۋدانى بارىنشا ايماقتاندىرۋ ەۋرازيالىق ەكونوميكالىق وداقتىڭ نەگىزگى ماقساتى بولۋى كەرەك»، - دەدى ب. سۇلتانوۆ. بۇدان بۇرىن حابارلانعانداي، بيىلعى جارتى جىلدا ىشكى تاۋار اينالىم 6,9 پايىزعا تومەندەدى.
