ۆەتناممەن اراداعى تاۋار اينالىمى سوڭعى 7 جىلدا 2 ەسە ارتتى - پرەمەر
تاراپتار ساۋدا، ترانزيت جانە لوگيستيكا، تۋريزم، اۋىل شارۋاشىلىعى سالالارىنداعى ءوزارا ءىس- قيمىلدىڭ وزەكتى ماسەلەلەرىن تالقىلادى.
پرەمەر- مينيستر 1992 -جىلى ديپلوماتيالىق قاتىناستار ورناعاننان بەرى قازاقستان مەن ۆەتنام سىندارلى ديالوگ ورناتىپ، ەكىجاقتى ءوزارا ءىس- قيمىلدىڭ جوعارى دەڭگەيىنە قول جەتكىزگەنىن اتاپ ءوتتى.
ونىڭ ايتۋىنشا، سوڭعى 7 جىلدا ەكى ەل اراسىنداعى تاۋار اينالىمى 2 ەسە ارتتى. بۇعان 2015 -جىلى ە ا ە و ەلدەرى مەن ۆەتنام اراسىنداعى ەركىن ساۋدا ايماعى تۋرالى كەلىسىمگە قول قويۋ ىقپال ەتتى.
«ءبىز قازىردىڭ وزىندە قازاقستاندىق ەكسپورتتى 90 تاۋار اتاۋى بويىنشا 500 ميلليوننان استام دوللارعا ۇلعايتۋعا دايىنبىز»، — دەدى ءاليحان سمايىلوۆ.
سونىمەن قاتار ءاليحان سمايىلوۆ قازاقستاندىق ازاماتتارعا ۆەتنامعا ۆيزاسىز كىرۋ مۇمكىندىگىن بەرۋ ماسەلەسىن كوتەردى، بۇل ەكى ەل اراسىنداعى ساۋدا جانە ءتۋريزمدى دامىتۋعا وڭ اسەر ەتەدى.
وعان قوسا، پرەمەر- مينيستر قازاقستان اۋىل شارۋاشىلىعى سالاسىندا، اسىرەسە كۇرىش شارۋاشىلىعىنداعى ىنتىماقتاستىقتى كەڭەيتۋگە ايتارلىقتاي قىزىعۋشىلىق تانىتىپ وتىرعانىن اتاپ ءوتتى.
«بۇل داقىلدى ءوسىرىپ- باپتاۋ بويىنشا عىلىمي زەرتتەۋلەر مەن زاماناۋي ۆەتنامدىق تەحنولوگيالاردىڭ ءبىزدىڭ ەلىمىز ءۇشىن پايداسى بار. ءبىز وسى باعىتتا ۆەتنامدىق ارىپتەستەرمەن ىسكەرلىك بايلانىستاردى باستاۋعا ءازىرمىز»، — دەدى ۇكىمەت باسشىسى.
ءوز تاراپىنان ۆو تحي ان سۋان ۆەتنامنىڭ قازاقستانمەن ىنتىماقتاستىقتى نىعايتۋ ماسەلەلەرىنە ۇلكەن ماڭىز بەرەتىنىن اتاپ ءوتتى.
«ەكى ەل اراسىنداعى سەنىمدى ساياسي ديالوگ ءوزارا ارىپتەستىكتى ودان ءارى كەڭەيتۋگە نەگىز بولىپ وتىر. گەوگرافيالىق جاعىنان توعىز جولدىڭ تورابىندا تۇرعان قازاقستان الەمدەگى ءىرى نارىقتاردى بىرىكتىرەدى. ءبىز ءوزارا ءتيىمدى باعىتتاردا بىرلەسىپ جۇمىس ىستەۋ ءۇشىن ناقتى ۇسىنىستاردى قاراستىرۋعا دايىنبىز»، — دەدى ۆو تحي ان سۋان.
