ءۇندىستاندا 7 جاسار قىزعا 202 ارتىق ءتىس شىققان
7 جاستاعى قىز ءتىسىنىڭ اۋىرعاندىعىن ايتىپ، اناسىنا شاعىمدانادى.
قىزىنىڭ ءتىسى ءىسىپ كەتكەنىن كورگەن اناسى ونى دەرەۋ اۋرۋحاناعا الىپ بارعان.
دارىگەرلەر قىزدىڭ اۋىز قۋىسىن رەنتگەنگە ءتۇسىرىپ، ودونتوما دەگەن دياگنوز قويادى.
اناسى دارىگەردەن بۇل اۋرۋ تۋرالى ەگجەي-تەگجەيلى ءتۇسىندىرىپ بەرۋىن سۇراعاندا، دارىگەرلەر قىزدىڭ اۋزىنا 202 «ارتىق» ءتىس وسكەندىگىن مالىمدەدى. سونداي-اق بۇعان وزدەرى دە تاڭدانىپ وتىرعاندارىن جاسىرمادى.
«بۇنداي وقيعامەن ءبىز ءبىرىنشى رەت كەزدەسىپ وتىرمىز. ارينە، بىرنەشە ارتىق ءتىسى بولعان ەمدەلۋشىلەر بولعان، ءبىراق 7 جاستاعى قىزدىڭ اۋزىندا 202 ءتىس بولۋ دەگەن - تاڭعاجايىپ وقيعا. ەندى ءبىز ول تىستەردى بىرتىندەپ جۇلۋىمىز قاجەت»، - دەدى دارىگەر- حيرۋرگ ادجوي رويچۋدحاري.
حيرۋرگتاردىڭ ايتۋىنشا، قىزدىڭ اۋزىنان 202 ءتىستى قاتارىنان جۇلۋ وڭايعا تۇسكەن جوق. وتا ءساتتى ءوتىپ، قازىر ءۇندىستاندىق قىزدىڭ جاعدايى جاقسى، دەپ جازادى شەتەلدىك ب ا ق.
