جاڭا 7-20-25 باعدارلاماسى: يپوتەكانىڭ باستى جەڭىلدىكتەرى قانداي؟
قايتالاما نارىقتاعى پاتەرلەردىڭ باعاسى دا ءتۇسىپ كەتتى. سەبەبى «7-20-25» - ءتىڭ يپوتەكاسى تەك جاڭا پاتەرلەرگە عانا تارالادى دەدى. الايدا كۇزگە تامان قايتالاما نارىقتىڭ باسپاناسىنا دا ارنايى شارتتار ازىرلەنەتىن بولدى. قازاقپارات ءتىلشىسى جاڭا يپوتەكالىق باعدارلاماعا قاتىستى سوڭعى جاڭالىقتاردى ساراپتاپ، يپوتەكانىڭ كىمگە جانە قانداي شارتتارمەن بەرىلەتىنىن انىقتادى. نەسيە الاتىندارعا كىرىس سالىعى بويىنشا ارنايى جەڭىلدىكتەر دە بەرىلەتىن كورىنەدى.
سونىمەن، «7-20-25» باعدارلاماسى بويىنشا استانا، الماتى، اقتاۋ مەن اتىراۋدا 25 ميلليون تەڭگەنىڭ باسپاناسىن يپوتەكاعا الۋعا بولادى. اتالعان سوما - ءۇيدىڭ شەكتى باعاسى. دەمەك، 20 پروتسەنت، ياعني 5 ميلليون تەڭگە نەسيە العان ادامنىڭ العاشقى جارناسى بولسا، قالعان 20 ميلليون تەڭگە 25 جىلعا قارىزعا بەرىلەدى. ال باسقا ايماقتاردا يپوتەكاعا بەرىلەتىن باسپانانىڭ شەكتى سوماسى 15 ميلليون تەڭگە (3 ميلليون - القاشقى جارنا، ال 12 ميلليون - قارىز) دەپ بەلگىلەندى. باعدارلامانىڭ قازىرگى شارتتارى بويىنشا زايمدى بەرۋ جانە قىزمەت كورسەتۋ بويىنشا ەشقانداي كوميسسيا تولەنبەيدى. كەپىلگە قويىلاتىن مۇلىكتى ساقتاندىرۋدىڭ دا قاجەتى جوق. الايدا ونداي تالاپ قويىلسا، بارلىق شىعىنداردى بانكتىڭ ءوزى وتەيتىن بولادى. كەپىلگە نەسيەگە بەرىلگەن ءۇيدىڭ ءوزى قويىلادى.
ارينە، جاڭا يپوتەكا تەك باسپاناسى جوق ازاماتتارعا عانا بەرىلەدى. ولار ءۇيدىڭ بار-جوعىن انىقتاما ارقىلى راستايدى. دەگەنمەن، جاتاقحانادا تۇراتىن وتباسىلار باعدارلاماعا قاتىسا الادى. اپاتتىق ۇيلەردىڭ تۇرعىندارىنا دا ونداي مۇمكىندىك بەرىلىپ وتىر. «سەبەبى جاتاقحانادا ءبىر وتباسىنىڭ مۇشەسىنە 15 شارشى مەتردەن دە كەلمەيدى. وندايدا ءوتىنىش بەرگەن ادام باسپانانىڭ يەسى رەتىندە قاراستىرىلمايدى. جاتاقحانا بولمەسى پاتەر ەمەس قوي. سوسىن ەسكى جانە اپاتتىق ۇيلەردىڭ تۇرعىندارى جاڭا باعدارلاماعا قاتىسا الادى. ءبىراق جەرگىلىكتى اتقارۋشى ورگاننان ءۇيدىڭ قازىرگى جاعدايىنا قاتىستى انىقتامانى الىپ كەلۋ كەرەك» ، - دەيدى ۇلتتىق بانك ءتوراعاسىنىڭ ورىنباسارى ولەگ سمولياكوۆ.
7 پروتسەنتتىك يپوتەكا ازىرشە تەك جاڭا پاتەرلەرگە عانا بەرىلەدى. ال كۇزگە قاراي قايتالاما نارىققا قاتىستى تالاپتار ازىرلەنەدى. دەگەنمەن، ونىڭ شارتتارى دا، پروتسەنتتىك مولشەرلەمەسى دە باسقاشا بولادى. و. سمولياكوۆتىڭ سوزىنە قاراعاندا، العاشقى جارنا 20 پروتسەنتتەن جوعارى قويىلادى. ال جىلدىق مولشەرلەمەسى نارىقتىق تالاپتارعا جاقىن بولۋى ابدەن مۇمكىن. ءبىراق بانكتەردىڭ قازىرگى 14-15 پروتسەنتىنەن تومەن بولادى. شىنى كەرەك، «7-20-25» - ءتىڭ ءتيىمدى شارتتارى قايتالاما نارىققا دا تاراسا، سپەكۋلياتيۆتى ساۋدا-ساتتىق كوبەيىپ كەتەدى. ماسەلەن، جاعدايى بار ادام ءوز پاتەرىن وسى يپوتەكامەن ساتىپ جىبەرەدى دە، ۇستىنەن اقشا قوسىپ، باسقا جەردەن ودان دا جاقسى ءۇيدى الا سالادى. ءيا، ءۇيسىز جۇرگەن ادام ءوز پاتەرىنە كىرەدى. ءبىراق وندايدا باعدارلاما «الەۋمەتتىك باستاما» دەگەن مارتەبەسىنەن ايىرىلادى. ويتكەنى باسپاناسىز جۇرگەن ازاماتتاردىڭ ەمەس، ءۇيى بارلاردىڭ جاعدايى جاقسارادى. وسىعان بايلانىستى جاڭا باعدارلامادا جاڭا پاتەرلەر مەن قايتالاما پاتەرلەردىڭ يپوتەكاسى ەكى بولەك شارتتارمەن بەرىلەتىن بولىپ جاتىر. ال «باسپانا» اتتى يپوتەكالىق كومپانيا الدىمەن الەۋمەتتىك ماڭىزى بار باعىتقا باسىمدىق بەرسە، ۋاقىت وتە كەلە، قايتالاما نارىققا دا قىزمەت كورسەتەتىن بولادى. ونسىز ەسكى ۇيلەردىڭ ساۋداسى جۇرمەي قالۋى ابدەن مۇمكىن.
ايتپاقشى، «7-20-25» - ءتىڭ كەلۋىمەن «نۇرلى جەر» مەملەكەتتىك باعدارلاماسىنىڭ يپوتەكالىق زاەمداردى سۋبسيديالاۋ باعىتى توقتاتىلادى. دەگەنمەن، قازاقستاننىڭ يپوتەكالىق كومپانياسى ارقىلى بەرىلگەن زاەمدار جويىلمايدى. 10 پروتسەنتتىك مولشەرلەمەسى دە، باسقا شارتتارى دا ساقتالادى. بۇدان بىلاي وسى جۇمىسقا «باسپانا» يپوتەكالىق كومپانياسى جاۋاپتى بولادى. «نۇرلى جەرگە» ەنگىزىلگەن تاعى ءبىر ماڭىزدى وزگەرىستەردىڭ ءبىرى - جۇمىس بەرۋشىنىڭ ءوز قىزمەتكەرىنىڭ باسپاناسى ءۇشىن العاشقى جارنانى قۇيۋ تەتىگى. «ءبىز مەملەكەتتىك جانە مەملەكەتتىك ەمەس ۇيىمدارعا ءوز قىزمەتكەرلەرىنە جاردەم جاساۋعا رۇقسات بەردىك. ماسەلەن، 20 پروتسەنتتىك العاشقى جارنانى قۇيۋ كەرەك دەپ وتىرمىز عوي. سوعان كومەكتەسۋگە بولادى. «تۇرعىن ءۇي جارناسى» دەيمىز عوي. وسىنداي تەتىكتەردى ەنگىزىپ جاتىرمىز. جاقسى جۇمىسكەر بولسا، سول قىزمەتتە كوپ جىلدار جۇمىس ىستەسە، كومەك بەرۋگە بولادى. اۋرۋحانادا، باسقا جەردە، اۋرۋحانانىڭ جاعدايىنا قاراي اقشاسى بولسا، جۇمىسكەرلەرگە ونداي كومەك جاساۋعا بولادى»، - دەدى ق ر ينۆەستيتسيالار جانە دامۋ ۆيتسە-ءمينيسترى قايىربەك وسكەنبايەۆ قازاقپارات تىلشىسىنە بەرگەن سۇحباتىندا. دەمەك، العاشقى جارنانى جۇمىس بەرۋشى دە سالا الادى. الايدا اتالعان شەشىمدى مەملەكەتتىك ورگان بولسىن، جەكە كومپانيا بولسىن، ءوز ەركىمەن قابىلدايدى. سەبەبى بۇل - مىندەتتى شارا ەمەس.
العاشقى جارنانى كىم قۇيسا دا، نەسيە العان ادامنىڭ تولەم قابىلەتتىلىگىنە باسا نازار اۋدارىلادى. ول دا - جاڭا باعدارلامانىڭ باستى شارتى. يپوتەكا تەك اي سايىنعى تولەمدەردى اۋدارا الاتىن ادامعا عانا بەرىلەدى. ءبىراق نەسيەنى تولەۋ مەرزىمىن وتكىزىپ الۋ جاعدايلارى دا ەسكەرىلەدى. وسى ورايدا ۇلتتىق بانك ناقتى سەبەپتەر بولسا، كەلىسىمنىڭ شارتتارىن وزگەرتۋگە كەڭەس بەرىپ وتىر. بۇدان بولەك، ءوسىم اقى، ايىپپۇل مەن سىياقىنى ءوشىرىپ تاستاۋعا بولادى. ارينە، بۇنىڭ بارلىعىن ەكىنشى دەڭگەيلى بانكتەر قولعا الۋى قاجەت. سەبەبى يپوتەكا سولار ارقىلى بەرىلەدى، سولار ارقىلى تولەنەدى. ال «باسپانا» يپوتەكالىق كومپانياسى پروتسەنتتىك مولشەرلەمەنى تومەندەتىپ، بانكتەرگە ءتيىستى كوميسسياسىن تولەپ وتىرادى. الداعى ۋاقىتتا ۇلتتىق بانك باعدارلاماعا قاتىساتىن بانكتەردىڭ تولىق ءتىزمىن ءوزىنىڭ رەسمي سايتىندا جاريالايدى. ال العاشقى يپوتەكالار ەكىنشى جارتىجىلدىقتا، ياعني شىلدە-جەلتوقسان ارالىعىندا بەرىلۋى ءتيىس.
ۇلتتىق بانكتىڭ تاعى ءبىر ۇتىمدى ۇسىنىسى - يپوتەكا ءۇشىن تولەيتىن اقشاعا كىرىس سالىعىن سالماۋ. وندايدا نەسيەنىڭ نەگىزگى سوماسىنا كەتەتىن قارجىنىڭ كىرىس سالىعى قايتارىلادى. ول ءۇشىن قارىز الۋشى ءوزى جۇمىس ىستەيتىن بۋحگالتەرياعا ءتيىستى قۇجاتتاردى تاپسىرادى. سونىڭ نەگىزىندە اي سايىن يپوتەكاعا كەتكەن اقشانىڭ كىرىس سالىعى ۇستالمايدى. بۇگىندە اتالعان نورما سالىق زاڭناماسىندا بار. ءبىراق ول تەك تۇرعىن ءۇي جيناق جۇيەسىنە عانا تارالادى. ۇلتتىق بانك ونداي جەڭىلدىكتى جاڭا يپوتەكالىق باعدارلاماعا قاتىساتىن ازاماتتارعا دا بەرۋدى ۇسىنىپ وتىر.
شىنى كەرەك، سوڭعى جىلدارى حالىقتىڭ باسىم بولىگى ءوز اقشاسىن تۇرعىن- ءۇي جيناق جۇيەسىنە كوپتەپ سالا باستادى. يپوتەكالىق نارىقتىڭ السىرەپ قالعانى دا سودان. وعان قوسا، ۇلەسكەرلىك قۇرىلىسقا قاتىستى زاڭناما دا كۇشەيتىلدى. بۇنىڭ بارلىعى ستاگناتسياعا اكەلىپ سوقتىردى. ال تۇرعىن ءۇي قۇرىلىس جيناق جۇيەسىنە قاتىساتىنداردىڭ سانى كۇرت ءوستى. سوڭعى ءۇش جىلدىڭ ىشىندە اتالعان جۇيە نارىقتىڭ 77 پروتسەنتىن الىپ قويدى. ەندى، «7-20-25» يپوتەكالىق باعدارلاماسىنىڭ كەلۋىمەن اتالعان كورسەتكىش وزگەرۋى ابدەن مۇمكىن. ونى تۇرعىن ءۇي قۇرىلىس جيناق بانكى دە سەزىپ وتىر. سودان بولار، «5-20-15» شارتتارىن ازىرلەۋگە كىرىستى. ال ەكى جۇيەنىڭ اراسىنداعى باسەكە قىزا بەرسە، ودان دا ءتيىمدى شارتتاردىڭ بولاتىنى انىق.
