ق ر پرەزيدەنتى: «7-20-25» باعدارلاماسىن جۇزەگە اسىرۋعا تريلليون تەڭگە تارتىلادى

بۇل تۋرالى بۇگىن ق ر پارلامەنتى پالاتالارىنىڭ بىرلەسكەن وتىرىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.

مەملەكەت باسشىسىنىڭ اتاپ وتۋىنشە، «7-20-25» باعدارلاماسىن جۇزەگە اسىرۋ ءۇشىن ۇلتتىق بانك پەن ۇكىمەت بىرلەسە جۇمىس ىستەۋى قاجەت.

«ۇلتتىق بانكتىڭ، ەكىنشى دەڭگەيلى بانكتەردىڭ جانە قور نارىعىنىڭ مۇمكىنشىلىكتەرىن پايدالانۋ قاجەت. ۇلتتىق بانك كەمىندە 1 تريلليون تەڭگە تارتىپ، ونى جوعارىدا اتالعان شارتتار نەگىزىندە بانكتەر ۇسىناتىن جاڭا يپوتەكالىق كرەديتتەردى ساتىپ الۋعا باعىتتايتىن ارنايى كومپانيا قۇرۋى قاجەت. باعدارلامانى جۇزەگە اسىرۋ ەلدەگى تۇرعىن ءۇي قۇرىلىسىن قۋاتتى سەرپىن بەرەدى»، - دەدى ەلباسى.

قازاقستان پرەزيدەنتىنىڭ پايىمىنشا، باعدارلامانى جۇزەگە اسىرۋ ناتيجەسىندە ميلليون قازاقستاندىق باسپانا الۋ مۇمكىندىگىنە يە بولادى.

«بۇعان قوسا، ەكونوميكانىڭ شاعىن جانە ورتا بيزنەستىڭ وسۋىنە جۇمىس ىستەپ، جاڭا جۇمىس ورىندارى قۇرىلادى. مەن ءار ۋاقىتتا دا قازاقستان ءۇشىن قۇرىلىس، اسىرەسە تۇرعىن ءۇي قۇرىلىسى وتە ۇلكەن مۋلتيپليكاتيۆتى اسەرى بار ەكەندىگىن ايتىپ كەلەمىن. تۇرعىن ءۇي قۇرىلىسى - بۇل قۇرىلىس ماتەريالدارى، مەتالدار، جيھازدار. سىزدەر مۇنىڭ بارلىعىن بىلەسىزدەر. ياعني، مۇنىڭ توڭىرەگىندە بيزنەستىڭ باسىم بولىگى دامىپ، جالپى ەكونوميكامىزدىڭ وسىمىنە اكەلەدى. ەڭ باستىسى ءبىزدىڭ كوپتەگەن ازاماتتارىمىزدىڭ، اسىرەسە جاس وتباسىلاردىڭ ارمانى شىندىققا اينالادى»، - دەدى نۇرسۇلتان نازاربايەۆ.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى