قازاقستاندا جاستار سانى 6 ميلليونعا جەتتى - مينيستر
بۇل تۋرالى ق ر اقپارات جانە قوعامدىق دامۋ ءمينيسترى دارحان قىدىرالى ايتتى، دەپ حابارلايدى قازاقپارات.
«مەملەكەت باسشىسىنىڭ 2019-جىلى بەرگەن تاپسىرماسى بويىنشا تاياۋدا مەملەكەتتىك جاستار ساياساتى تۋرالى زاڭ قابىلداندى. زاڭعا سايكەس، جاستار ساناتى 35 كە دەيىن ۇلعايدى. وسىلايشا، ەلىمىزدەگى وسى ساناتتاعى ازاماتتار سانى 6 ميلليونعا دەيىن كوبەيدى. ەندى سالادا اۋقىمدى ىستەر اتقارىلىپ، زاڭ يگىلىگىن بارشا جاستارىمىز كورەدى دەگەن سەنىمدەمىز»، - دەدى د. قىدىرالى مينيسترلىكتىڭ كەڭەيتىلگەن القا وتىرىسىندا.
پرەزيدەنت تاپسىرماسىنا سايكەس، 2023-2027-جىلدارعا ارنالعان مەملەكەتتىك جاستار ساياساتى تۇجىرىمداماسى جوباسى ازىرلەنىپ، اشىق تالقىلاۋعا ۇسىنىلدى.
«ەلىمىزدەگى جاستار رەسۋرستىق ورتالىقتارىنا ءبىر جىل ىشىندە 400 مىڭنان استام ادام ءتۇرلى ماسەلەمەن جۇگىنگەن. سوندىقتان، ەلىمىزدىڭ بارلىق وڭىرىندە جاستار رەسۋرستىق ورتالىقتارى اشىلۋى قاجەت دەپ ويلايمىز»، - دەدى د. قىدىرالى.
