اتىراۋدا قاۋىپسىزدىك بەلدىگىن تاقپاعان 6 مىڭعا جۋىق جۇرگىزۋشى جازالاندى
وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، قاۋىپسىزدىك بەلدىگى - كەز كەلگەن جۇرگىزۋشى مەن جولاۋشىلاردى سەنىمدى قورعاۋ قۇرالى. ءبىراق، بۇل ەرەجەنى ەلەمەيتىندەر بار.
«اتىراۋ قالاسىنىڭ اۋماعىندا جىل باسىنان بەرى 6 مىڭعا جۋىق جۇرگىزۋشى قاۋىپسىزدىك بەلدىگىن تاقپاعانى ءۇشىن اكىمشىلىك جاۋاپكەرشىلىككە تارتىلدى. مۇنداي زاڭ بۇزۋشىلىق جەدەل باسقارۋ ورتالىعىنىڭ بەينەباقىلاۋ كامەرالارى ارقىلى انىقتالدى. ماسەلەن، ورتالىقتىڭ ينسپەكتورلارى ق. ساتبايەۆ كوشەسىنىڭ بويىندا Toyota Camry اۆتوكولىگىنىڭ جۇرگىزۋشىسى قاۋىپسىزدىك بەلدىگىن تاقپاعانىن تىركەدى. كولىك جۇرگىزۋشىسىنىڭ كىم ەكەنى انىقتالىپ، وعان قاتىستى قر اكىمشىلىك قۇقىقبۇزۋشىلىق تۋرالى كودەكسىنىڭ 593-بابى 2-بولىگىمەن اكىمشىلىك حاتتاما تولتىرىلدى. جۇرگىزۋشىگە 5 ايلىق ەسەپتىك كورسەتكىش كولەمىندە 15315 تەڭگە ايىپپۇل سالىندى.
جۇرگىزۋشى دە، بارلىق جولاۋشىلار دا كەز كەلگەن جاعدايعا قاراماستان ءار ساپاردا قاۋىپسىزدىك بەلدىگىن تاعۋعا مىندەتتى ەكەنىن ەسكەرتەمىز»، - دەيدى اتىراۋ قالالىق پوليتسيا باسقارماسى پاترۋلدىك پوليتسيا باتالونىنىڭ كومانديرى داۋرەن ءناسيپوللا.
سونداي- اق كولىك تەرەزەسىن زاڭسىز قاراڭعىلاعان 1,5 مىڭعا جۋىق جۇرگىزۋشىگە ايىپپۇل سالىنعان.
ەسكە سالا كەتەلىك، بۇعان دەيىن اتىراۋدا جەڭىل كولىك اۆتوبۋسپەن سوقتىعىسىپ، جۇرگىزۋشى كوز جۇمعانىن حابارلاعان ەدىك.
اۆتور
بەك مۇستافا
