اقتوبەدە جازعى لاگەرگە رەسەيدىڭ 6 وڭىرىنەن ەتنيكالىق قازاق بالالار كەلەدى
اقتوبەدە بالالاردىڭ جازعى دەمالىسىن ۇيىمداستىرۋ بىرنەشە باعىت بويىنشا جۇرگىزىلەدى. قالا سىرتىندا، مەكتەپ جانىندا شاتىرلى لاگەر ۇيىمداستىرىلادى. از قامتىلعان، اتاۋلى الەۋمەتتىك كومەك الاتىن، جەتىم جانە اتا- انا قامقورلىعىنسىز قالعان بالالار ەرەكشە نازاردا بولادى.
«جازدا وقۋشىلاردىڭ %90 دەمالىس جانە ساۋىقتىرۋ ءىس- شاراسىنا قاتىستىرىلادى. ارنايى ساناتتاعى بالالار ءۇشىن بيۋدجەتتەن قارجى قاراستىرىلدى. ولار ءۇشىن 320 ميلليون تەڭگە قارجى ءبولىنىپ وتىر»، - دەدى وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا.
تەك وڭىردەگى وقۋشىلار ەمەس، كورشى رەسەي ەلىندە تۇراتىن قازاق بالالارى دا اقتوبەدە تىنىعادى.
«ماۋسىم- تامىز ايلارىندا ءبىلىم الۋعا ەرەكشە قاجەتتىلىكتەرى بار بالالارعا ارنالعان «كۇنشۋاق» لاگەرىندە 312 بالا دەمالادى. سونداي- اق، بالالار جىلى اياسىندا وسى «كۇنشۋاق» لاگەرىنىڭ بازاسىندا حالىقارالىق تىلدىك لاگەردى ۇيىمداستىرۋدى جوسپارلاپ وتىرمىز. لاگەرگە رەسەي فەدەراسىندا تۇراتىن ەتنيكالىق قازاق وتباسىلارىنىڭ بالالارى قاتىسادى. لاگەر باعدارلاماسىندا قازاق ءتىلىنىڭ ساباقتارى ۇيىمداستىرىلىپ، قوبدا جانە ويىل اۋداندارىنا ءبىر كۇندىك ەكسكۋرسيا جوسپارلانىپ وتىر. جوسپار بويىنشا رەسەيدىڭ 6 وڭىرىنەن 30 بالا كەلەدى. ولار: التاي رەسپۋبليكاسى، ماسكەۋ، ورىنبور، سامارا، ساراتوۆ، چەليابى»، - دەدى نۇرگۇل بەرتىلەۋوۆا.
ال تۋريستىك ساياحاتتا 12 مىڭعا جۋىق بالا قامتىلادى. جوسپار بويىنشا 9 مىڭنان استام وقۋشى ءوڭىردىڭ، وزگەسى ەلىمىزدىڭ كيەلى جەرلەرىن ارالايدى.
«جازعى ماۋسىمدا وڭىردەگى 48 قوسىمشا ءبىلىم بەرۋ ۇيىمى جانىنان دا جازعى الاڭ مەن ۇيىرمە جۇمىس ىستەيدى. شىعارماشىلىق، سپورتتىق- تۋريستىك، عىلىمي- تەحنيكالىق جانە تىلدىك باعىتتارداعى الاڭدار بولادى. سونىمەن بىرگە جازعى ۋاقىتتا ايتەكە بي، بايعانين، ىرعىز، قارعالى، تەمىر، ويىل، حرومتاۋ، شالقار اۋداندارى مەن اقتوبە قالاسىندا 10 مىڭعا جۋىق بالا اباتتاندىرۋ، كوگالداندىرۋ جۇمىستارىنا تارتىلىپ، ەڭبەكپەن قامتىلادى»، - دەدى نۇرگۇل بەرتىلەۋوۆا.
