الماتىدا 6 زاۋىت سالىنادى
بۇل تۋرالى «جاڭا الماتىنى» دامىتۋدىڭ 2020-2024 -جىلدارعا ارنالعان كەشەندى جوسپارىن ىسكە اسىرۋعا ارنالعان دوڭگەلەك ۇستەل وتىرىسىندا ايتىلدى، دەپ حابارلايدى قازاقپارات ءتىلشىسى.
ساراپتامالىق تالقىلاۋ بارىسىندا قالالىق ستراتەگيا جانە بيۋدجەت باسقارماسىنىڭ باسشىسى الماس باتانوۆ شەت ەلدەردە بيزنەستى دامىتۋ «جاڭا الماتىنى» دامىتۋدىڭ كەشەندى جوسپارىنىڭ باعىتتارىنىڭ ءبىرى ەكەنىن اتاپ ءوتتى.
«التى زاۋىت پەن التى ساۋدا ءۇيىنىڭ قۇرىلىسى قاراستىرىلعان. بارلىق نىساندار بويىنشا جاقسى ديناميكا بايقالادى، بۇل نىساندار مەرزىمىندە تاپسىرىلادى. وسىلايشا، التى ونەركاسىپتىك كاسىپورىننىڭ بەسەۋى ىسكە قوسىلدى»، - دەدى الماس باتانوۆ.
«جاڭا الماتىنى» دامىتۋ كەشەندى جوسپارىن جۇزەگە اسىرۋ اياسىندا وتكەن جىلى قۇنى 28 ميلليارد تەڭگە بولاتىن اۆتوكولىك قۇرالدارىن شىعاراتىن زاۋىت ىسكە قوسىلدى. سونداي- اق مەتالل وڭدەۋ جانە جىلجىمالى قورشاۋ كونسترۋكتسيالارى مەن اۆتوماتتى قاقپالاردى وندىرەتىن كاسىپورىن پايدالانۋعا بەرىلدى. قاعاز سۇلگىلەر مەن مايلىقتار شىعاراتىن جاڭاتسەحتىڭ قۇرىلىسى دا اياقتالدى.
سونىمەن قاتار، الماس باتانوۆ ءسۇت زاۋىتىن جاڭعىرتۋ اياسىندا ءونىم اسسورتيمەنتىن كەڭەيتۋ جانە تۇزدىقتار، مايونەزدەر مەن كەتچۋپتەر ءوندىرۋ، وسىمدىك مايىن قۇيۋ بويىنشا كەشەن سالۋ ءۇشىن قوسىمشا جابدىق ساتىپ الىنعانىن جەتكىزدى. كاسىپورىننىڭ قۋاتتىلىعى جىلىنا 10 مىڭ توننادان 30 مىڭ تونناعا دەيىن ارتادى.
جىل سوڭىنا دەيىن مەديتسينالىق ماقساتتاعى دياگنوستيكالىق تەستىلەردى ءوندىرۋ زاۋىتىن ىسكە قوسۋ كوزدەلگەن. قازىرگى كەزدە ىسكە قوسۋ- جوندەۋ جۇمىستارى، ەلەكتر جەتكىزۋ، جابدىقتى ورناتۋ جۇرگىزىلۋدە. قالانىڭ ونەركاسىپتىك الەۋەتىن دامىتۋ بيزنەسكە ءتيىستى ينجەنەرلىك ينفراقۇرىلىمى بار جەر ۋچاسكەلەرى بەرىلەتىن يندۋستريالىق ايماقتى دامىتۋمەن تىعىز بايلانىستى. اۆتور: الما مۇقانوۆا
