قازاقپارات كۇنتىزبەسى: 6- قاڭتار
ەستە قالار وقيعالار
1938-جىلى وتانىن ساتقاندار ايەلدەرىنىڭ اقمولاداعى لاگەرىنە (الجير) تۇتقىنداردىڭ (ايەلدەر) العاشقى لەگى اكەلىندى. ولاردىڭ قولىندا 1 جاستان 3 جاسقا دەيىنگى بالالارى دا بولدى. لاگەر قازىرگى استانا قالاسىنىڭ وڭتۇستىك-باتىسىندا، توڭكەرىس (بۇرىنعى اتى - مالينوۆكا) ەلدى مەكەنىندە قۇرىلدى.
ەكىنشى دۇنيەجۇزىلىك سوعىس جىلدارىندا لاگەردە 8 مىڭعا جۋىق ايەل تۇتقىندا بولدى.
1950 -جىلدىڭ باسىندا الجير تاراتىلىپ، 1953 -جىلى تولىقتاي جابىلدى.
1971 -جىلى الماتىدا قازاقستانداعى العاشقى عىلىمي-تەحنيكالىق اقپارات ورتالىعى قۇرىلدى.
2009 -جىلى «قازاق مەديتسينالىق اكادەمياسى» ا ق «استانا مەديتسينالىق ۋنيۆەرسيتەتى» ا ق بولىپ قايتا قۇرىلىپ، «ۇلتتىق مەديتسينالىق حولدينگ» ا ق- نىڭ قۇرامىنا كىردى.
2010 -جىلى «قازپوشتا» اكتسيونەرلىك قوعامى قازاقستان رەسپۋبليكاسىنىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا ءتوراعالىعىنا ارنالعان كوركەم سۋرەتتى پوشتا ماركاسىن اينالىمعا شىعاردى. ءتورت بوياۋلى وفسەتتىك باسپا ادىسىمەن ورىندالعان ماركانىڭ نومينالى 230 تەڭگە، تارالىمى 30 مىڭ دانا، سۋرەتشىسى - دانيار مۇحامەدجانوۆ.
2012 -جىلى قىزىلوردا وبلىستىق مادەنيەت باسقارماسى «قايتالانبايتىن داۋىستار» ديسكىلەر جيناعىن شىعاردى. 28 ديسكتەن قۇرالعان بۇل جيناققا وڭىردەن شىققان 225 تانىمال ونەر جانە ادەبيەت قايراتكەرى، ارتىستەر مەن عالىمداردىڭ اندەرى مەن كۇيلەرى، سونداي-اق ادەبي شىعارمالارى ەندى.
سولاردىڭ ىشىندە مۇستافا شوقاي، ءابدىلدا تاجىبايەۆ، مۇحامەدجان قاراتايەۆ، اسقار توقماعامبەتوۆ، اۋەلبەك قوڭىراتبايەۆ، زەينوللا شۇكىروۆ، ءابدىجامىل نۇرپەيىسوۆ، قالتاي مۇحامەدجانوۆ سەكىلدى تانىمال تۇلعالار بار.
2012 -جىلى ەكىباستۇزدا قازاقستاننىڭ گلوبۋسى جاسالدى. ءمۇسىنشى عامال ساعيدەنوۆ وسى تۋىندىسىن بەيبىتشىلىك جانە كەلىسىم مونۋمەنتى دەپ اتادى. قازاقستاننىڭ گەوگرافيالىق كەسكىنى گلوبۋستىڭ ءون بويىن تۇگەل الىپ جاتىر ءارى وندا بەيبىتشىلىكتىڭ سيمۆولى سانالاتىن كوگەرشىندەر كەسكىندەلگەن.
2014 -جىلى ەۋروپا بيزنەس اسسامبلەياسى «استاناگورارحيتەكتۋرا» ج ش س- نە ارحيتەكتۋرا مەن قۇرىلىس سالاسىندا جەتكەن جەتىستىكتەرى مەن ساپاسى ءۇشىن «Best Enterprise « («ۇزدىك مەكەمە») بەدەلدى ماراپاتىن تاپسىردى.
2016-جىلى دۇنيەجۇزىنە تانىمال قازاقستاندىق بىلعارى قولعاپ شەبەرى گەننادي گولوۆكيندى بەلگىلى امەريكالىق boxing.com سايتى 2015 -جىلدىڭ ۇزدىك بوكسشىسى دەپ جاريالادى.
2017 -جىلى سيريا اراب رەسپۋبليكاسىنىڭ جەرورتا تەڭىزى جاعالاۋىندا ورنالاسقان تارتۋس پورتىنا قازاقستاننان گۋمانيتارلىق كومەك جەتكىزىلدى.
جۇكتى تاپسىرۋ شاراسىنا قازاقستان رەسپۋبليكاسىنىڭ يوردانياداعى ەلشىسى ازامات بەردىباي قاتىستى. 33 كونتەينەرگە سالىنعان 500 توننا جۇكتىڭ ىشىندە ازىق- تۇلىك پەن ءدارى-دارمەك بولدى.
2019-جىلى الماتى وبلىسى تالعار اۋدانىندا جىل بويى جۇمىس ىستەيتىن سپورتتىق-وتباسىلىق تيپتەگى «ويقاراعاي لەسنايا سكازكا» تاۋ- شاڭعى كەشەنى اشىلدى. جاز مەزگىلىندە شاڭعى جولدارى ۆەلوسيپەد تەبۋگە لايىقتالادى. تاۋ- شاڭعى كەشەنىنىڭ جالپى اۋماعى 85 گەكتار. تەڭىز دەڭگەيىنەن 1500-1800 مەتر بيىكتىكتە ورنالاسقان. الداعى جىلداردا سىرعاناۋعا ارنالعان 13 كيلومەتر جولدى 40 كيلومەرگە جەتكىزۋ جوسپارلانعان.
2020 -جىلى قازاقستان مەن ا ق ش ەكى ەل اراسىنداعى تىكەلەي تۇراقتى رەيستەردى ورىنداۋ ءۇشىن قۇقىقتىق بازانى قالىپتاستىرۋشى اۋە قاتىناسى تۋرالى كەلىسىمگە قول قويدى. وسى كەلىسىم حالىقارالىق ازاماتتىق اۆياتسيا ۇيىمىنىڭ (ICAO) اۋە كولىگىن ودان ءارى ليبەراليزاتسيالاۋ جونىندەگى ۇسىنىمدارىنا سايكەس «اشىق اسپان» قاعيداتتارىن كوزدەيتىن قازاقستان رەسپۋبليكاسى ءۇشىن العاشقى قۇجات بولدى.
