بوبەكتەر ۇيىندە بالالار 6 جاسقا دەيىن بولۋى كەرەك - دەپۋتات

ول ۇكىمەت باسشىسى اسقار ماميننىڭ اتىنا دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.

«1994-جىلى قازاقستان بالالار قۇقىعى تۋرالى ب ۇ ۇ كونۆەنتسياسىن راتيفيكاتسيالادى. ونىڭ 3- بابىنا سايكەس، كونۆەنتسياعا مۇشە مەملەكەتتەردىڭ ءبارى دە ءوزىنىڭ بالالارعا دەگەن قارىم-قاتىناسىندا ەڭ ءبىرىنشى كەزەكتە ولاردىڭ مۇددەلەرىن قامتاماسىز ەتۋ ماسەلەسىنە نازار اۋدارادى.

اسىرەسە اتا-انالارىنىڭ قاراۋىنسىز قالعان جانە مۇگەدەك بالالاردى مەملەكەت ەرەكشە قامقورلىققا الۋى ءتيىس»، - دەيدى زاعيپا باليەۆا پارلامەنت ءماجىلىسىنىڭ وتىرىسىندا.

ونىڭ ايتۋىنشا بۇگىنگى تاڭدا ەلدە 20 بوبەكتەر ءۇيى بار. وندا ءۇش جاسقا دەيىنگى ساۋ جانە ءتورت جاسقا دەيىنگى مۇمكىندىگى شەكتەۋلى بالالار تۇرادى.

جىلىنا 200 گە تارتا بالا ول مەكەمەلەردەن بالالار ۇيىنە نەمەسە مامانداندىرىلعان ينتەرناتتارعا ورنالاستىرىلادى.

«ايتسە دە ولاردىڭ بوبەكتەر ۇيىنەن بالالار ۇيىنە نەمەسە مامانداندىرىلعان ينتەرناتتارعا 3-4 جاسىندا جەتكىزىلۋى بوبەكتەرگە اۋىر پسيحولوگيالىق سوققى بولىپ تيەدى. بۇعان جول بەرمەۋ كەرەك. عالىمداردىڭ زەرتتەۋىنشە 0-6 جاس ارالىعىنداعى بالالارعا ەرەكشە قامقورلىق كورسەتىلۋى ءتيىس، سەبەبى ءدال وسى ارالىقتا بالا تۇلعا بولىپ قالىپتاسادى. بوبەكتەر ۇيىندەگى تاربيەشى پەداگوگيكالىق قىزمەتكەر ءرولىن عانا اتقارمايدى، ول كوبىنەسە بالاعا انا ورنىنا انا بولادى. ونى باعىپ-قاعىپ، بوبەكتەرگە قيىندىقتاردان قينالماي وتۋگە كومەكتەسەدى. سول سەبەپتى وسىناۋ جىلى قارىم-قاتىناستى بارىنشا ۇزارتىپ، بوبەككە مەكتەپكە دەيىنگى بۇكىل بالالىق شاعىن ونى تۇسىنەتىن جاقىندارىنىڭ ورتاسىندا وتكىزۋگە مۇمكىندىك بەرۋ كەرەك»، - دەيدى دەپۋتات.

زاعيپا باليەۆا وسى ماسەلەگە بايلانىستى ۇكىمەت باسشىسىنان بالالاردىڭ بوبەكتەر ۇيىندەگى تاربيەلەنۋ مەرزىمىن 6 جاسقا دەيىن ۇزارتۋدى سۇراپ وتىر.

ايتۋىنشا بۇل شارالار رەسپۋبليكالىق بيۋجەتتەن قوسىمشا شىعىنداردى قاجەت ەتپەيدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى