قازاقستاننىڭ 6 ءوڭىرى «ە- قىلمىستىق ءىس» جۇيەسىنە كوشىرىلدى

بۇل تۋرالى AntikorNews باعدارلاماسىندا ايتىلدى، دەپ حابارلايدى قازاقپارات ءتىلشىسى.

«سيفرلاندىرۋ باعىتتارىنىڭ وزەكتىلىگىن ەسكەرە وتىرىپ، اگەنتتىك سوتقا دەيىنگى تەرگەپ- تەكسەرۋدى ەلەكتروندىق فورماتتا جۇرگىزۋ ءۇشىن جۇمىس ورىندارىن تولىق جاراقتاندىرۋ جانە وڭدەلەتىن دەرەكتەردىڭ قاۋىپسىزدىگىن قامتاماسىز ەتۋ بويىنشا جۇمىستى جەدەلدەتۋدە. قازىرگى ۋاقىتتا 6 ءوڭىر: اقمولا، جامبىل، اتىراۋ، باتىس قازاقستان، پاۆلودار وبلىستارى جانە الماتى قالاسى قىلمىستىق ءىس جۇرگىزۋدىڭ ەلەكتروندىق فورماتىنا كوشتى»، - دەيدى اگەنتتىك ءتوراعاسىنىڭ سيفرلاندىرۋ ماسەلەلەرى بويىنشا كومەكشىسى اسلان قۇسايىنوۆ.

وسى جىلدىڭ 7 ايىندا ەلەكتروندى فورماتتا 81 قىلمىستىق ءىس (اتىراۋ – 38، ب ق و – 13، پاۆلودار – 13، اقمولا – 12، جامبىل – 2، الماتى قالاسى - 3) بويىنشا تەرگەۋ جۇرگىزىلدى، ونىڭ 36 - سى سوتقا جىبەرىلدى (ب ق و – 12، اتىراۋ – 11، پاۆلودار – 9، الماتى قالاسى – 3، اقمولا-1)، اقتاۋ نەگىزدەرى بويىنشا 16 سى توقتاتىلدى، قالعاندارى وندىرىستە.

«مۇنداي فورماتتى پايدالانۋ، ەڭ الدىمەن، قىلمىستىق ىستەردى تەرگەۋ پروتسەسىندە سىبايلاس جەمقورلىق تاۋەكەلدەرىن تومەندەتۋگە اسەر ەتەدى، ويتكەنى اشىقتىق پەن اشىقتىق دەڭگەيى ارتادى، سونداي- اق دەرەكتەردى قورعاۋ بويىنشا قولدانىلاتىن تەحنولوگيالار قىلمىستىق ىستەگى قۇجاتتاردى بۇرمالاۋعا جانە اۋىستىرۋعا كەدەرگى كەلتىرەدى. بۇل ءوز كەزەگىندە قىلمىستىق ءىس جۇرگىزەتىن ورگاندار قىزمەتكەرلەرىنىڭ ەسەپ بەرۋ جاۋاپكەرشىلىگى مەن ءتارتىبىن كۇشەيتەدى»، - دەيدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى