تاعى 6 مەديتسينا قىزمەتكەرىنەن كوروناۆيرۋس انىقتالدى
ب ق و اكىمدىگى ءمالىم ەتكەنىندەي، ەكى ادامنىڭ ءبىرى - رەسەيدە جۇمىس جاسايتىن 29 جاستاعى وبلىس تۇرعىنى، ەكىنشىسى - سول ەلدىڭ جوعارى وقۋ ورنىندا وقيتىن شىمكەنت قالاسىنىڭ 18 جاستاعى تۇرعىنى.
ولار رەسەيمەن شەكتەسەتىن «تاسقالا» جانە «سىرىم» اۆتووتكەلدەرىنەن وتكەن كەزدە دەنساۋلىقتارىنا شاعىمى بولماعان. الگوريتمگە سايكەس جەدەل جاردەم شاقىرىلىپ، كارانتيندىك ستاتسيونارعا جاتقىزىلعان كەزدە اۋرۋعا شالدىققانى انىقتالدى. قالعان 6 ادام - مەديتسينا قىزمەتكەرى. ولاردىڭ ءبارى كوروناۆيرۋس جۇقتىرۋ قاۋپى جوعارى مەديتسينا قىزمەتكەرى رەتىندە تەكسەرىلگەن بولاتىن. سەگىز ناۋقاس تا وبلىستىق جۇقپالى اۋرۋلار اۋرۋحاناسىنا ورنالاستىرىلدى. ولارمەن قارىم-قاتىناستا بولعان ادامدار انىقتالىپ، مەديتسينالىق باقىلاۋعا الىندى. اۋرۋ وشاقتارىندا دەزينفەكسيالىق جۇمىستار جۇرگىزىلدى.
وسىلايشا ب ق و- دا اۋىرعاندار سانى 146 عا جەتىپ، سونىڭ 9 ى ەمدەلىپ شىقتى. ب ق و تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى مۇحامعالي ارىسپايەۆ وبلىستىق جۇقپالى اۋرۋلار اۋرۋحاناسى مەن كارانتيندىك ستاتسيونارداعى دارىگەرلەر مەن مەدبيكەلەردىڭ ۇيلەرىنە بارماي، جاتاقحانا مەن قوناقۇيدە جاتىپ، قىزمەت اتقارىپ جۇرگەنىن، ولاردىڭ ءار 14 كۇن سايىن سايىن سكيرينگتىك تەكسەرۋدەن وتكىزىلىپ جاتقانىن جەتكىزدى.
«سونداي تەكسەرۋ قورىتىندىسى ناتيجەسىندە سوڭعى ەكى تاۋلىكتە 10 مەدبيكەنىڭ اۋرۋ جۇقتىرعانى بەلگىلى بولدى. ولارمەن قارىم-قاتىناستا بولعان 11 مەديتسينا قىزمەتكەرى كارانتيندىك ستاتسيونارعا جاتقىزىلدى. مەديتسينا قىزمەتكەرلەرى الداعى ۋاقىتتا دا سكيرينگتىك تەكسەرۋدەن وتەتىن بولادى»، دەدى م. ارىسپايەۆ. وبلىستا تىركەلگەن 146 ناۋقاستىڭ 119 ى نەمەسە 86 پايىزى - دەنى رەسەيدەن، سونداي-اق اتىراۋ وبلىسىنان كەلگەندەر، 26 سى - بۇرىن اۋىرعاندارمەن بايلانىستا بولعاندار. ءبىر ناۋقاستىڭ قايدان جۇقتىرعانى انىقتالۋ ۇستىندە.
«وبلىستىق جۇقپالى اۋرۋلار اۋرۋحاناسىندا ەمدەلىپ جاتقان ناۋقاستاردىڭ 80 پايىزى جەڭىل، قالعان 20 پايىزى ورتاشا اۋىر حالدە. 6 ەمدەلۋشىدە پنيەۆمونيا بولعانىمەن، تىنىس الۋى قالىپتى»، دەدى وبلىستىق دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆ.
ەسكە سالا كەتەيىك، بۇدان بۇرىن ب ق و-دا كوروناۆيرۋس انىقتالعان 11 ناۋقاستىڭ جەتەۋى تۇركىستان وبلىسىنىڭ تۇرعىندارى ەكەندىگىن جازعان بولاتىنبىز.
