قازاقپارات كۇنتىزبەسى: 6- ناۋرىز
اتاۋلى كۇندەر
بۇكىل الەمدىك ءتىس دارىگەرى كۇنى
1790-جىلى دجوردج ۆاشينگتوننىڭ جەكە ءتىس دارىگەرى دجون گينۆۋد ستوماتولوگيالىق بور جاساپ شىعاردى جانە ول وسى كۇننىڭ كۇنتىزبەگە ەنۋىنە كوپ ەڭبەك ءسىڭىردى.
ەستە قالار وقيعالار
1917-جىلى 1916-جىلعى كوتەرىلىسكە قاتىسۋشىلارعا راقىمشىلىق جاريالانىپ، ۋاقىتشا ۇكىمەت بۇرىنعى اكىمشىلىك قۇرىلىمدارمەن قاتار وبلىستىق جانە ۋەزدىك كوميسسارياتتار قۇرا باستادى. تورعاي وبلىسىنا ءاليحان بوكەيحان، جەتىسۋعا مۇحامەدجان تىنىشبايەۆ، ورالعا حالەل دوسمۇحامەد ۇلى، ال قوستاناي ۋەزىنە احمەد ءبىرىمجان ۇلى كوميسسار بولىپ سايلاندى.
1987-جىلى قازاق ك س ر مينيسترلەر كەڭەسى مەن قازاقستان كومپارتياسى و ك- ءنىڭ «رەسپۋبليكادا قازاق ءتىلىن وقىتۋدى جاقسارتۋ تۋرالى» جانە «رەسپۋبليكادا ورىس ءتىلىن وقىتۋدى جاقسارتۋ تۋرالى» قاۋلىلارى قاتار جارىق كوردى.
1992-جىلى قازاقستان رەسپۋبليكاسى مەن ەگيپەت اراب رەسپۋبليكاسى اراسىندا ديپلوماتيالىق قارىم-قاتىناس ورناتىلدى.
2009-جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ داعدارىسقا قارسى شارالاردى قابىلداۋعا باعىتتالعان «داعدارىستان جاڭارۋ مەن دامۋعا» اتتى قازاقستان حالقىنا جولداۋىن ارنادى. ونىڭ نەگىزگى ماقساتى - ادام كاپيتالىن دامىتۋ مۇمكىندىكتەرىن ساقتاۋ، ءىرى جوبالاردى ىسكە اسىرۋدىڭ ەسەبىنەن تۇرعىنداردى جۇمىسپەن قامتۋ، ەكسپورتقا ارنالعان ءوندىرىستى ءارتاراپتاندىرۋدى قامتاماسىز ەتۋ.
2014-جىلى قازاق جانە ورىس تىلدەرىندە «استانا: جەنسكي رود» الماناعى جارىق كوردى. وندا ساياساتتا، بيزنەستە، قوعامدىق سالالار جانە عىلىمدا، سپورتتا، ونەر الەمىندە، اعارتۋ جانە مەديتسينادا تولاعاي تابىستارعا قول جەتكىزگەن قازاقستاندىق ايەلدەردىڭ ءومىرباياندارى بەرىلگەن.
2014-جىلى بەرليندە قازاقستان رەسپۋبليكاسىنىڭ ەكونوميكالىق جانە مادەني ورتالىعىنىڭ رەسمي اشىلۋ ءراسىمى ءوتتى. بۇل قازاقستاندىق- گەرماندىق ساۋدا-ەكونوميكالىق، مادەني-گۋمانيتارلىق ىنتىماقتاستىعىن نىعايتۋ مەن كەڭەيتۋگە باعىتتالعان كەزەكتى قادام بولدى. شارا قورىتىندىسى بويىنشا، ق ر ۇلتتىق كاسىپكەرلەر پالاتاسى مەن شىعىس گەرمان ەكونوميكا كوميتەتى اراسىنداعى ىنتىماقتاستىق تۋرالى مەموراندۋمعا قول قويىلدى.
2015-جىلى قازاقستان مەن موناكو قىلمىستىق ىستەر بويىنشا ءوزارا قۇقىقتىق كومەك تۋرالى شارتقا قول قويدى.
2016-جىلى قاراعاندى مەملەكەتتىك يندۋستريا ۋنيۆەرسيتەتىنىڭ وقىتۋشىسى، حيميا عىلىمدارىنىڭ كانديداتى ۆلاديمير مەركۋلوۆ عىلىم مەن ونەرتابىستى دامىتۋعا قوسقان ۇلەسى ءۇشىن الفرەد نوبەل اتىنداعى مەدالمەن ماراپاتتالدى.
2019-جىلى امەريكادا قازاقستاندىق بويجەتكەندەردىڭ باستاماسىمەن «گۇلدەر» ءبي ءانسامبلى قۇرىلدى.
