اقتوبەلىك قايتىس بولعان ادامنىڭ زەينەتاقىسىن 6 اي العان
اقتوبە وبلىستىق پروكۋراتۋراسى ىشكى ىستەر ورگاندارى مەن «ازاماتتارعا ارنالعان ۇكىمەت» كورپوراتسياسى فيليالىنىڭ جۇمىسىن بىرىكتىردى. سەبەبى جىل سايىن قايتىس بولعان ادامنىڭ زەينەتاقىسىن الىپ، ونى ءوز پايداسىنا جاراتىپ وتىراتىندار تىركەلىپ جاتىر. كەيبىرى بۇل تۋرالى حابار بەرىپ، ارنايى ورگاندارعا جەتكىزەدى. ال 6 اي بويى زەينەتاقى الىپ، ەسەپشوتقا تۇسكەن 500 مىڭ تەڭگە قارجىسىن جۇمساپ جىبەرگەندەر بار. زاڭ بويىنشا قايتىس بولعان ادامنىڭ زەينەتاقىسى كەرى قايتارىلادى.
«ىشكى ىستەر ورگاندارى جىل سايىن «ازاماتتارعا ارنالعان ۇكىمەت» كورپوراتسياسى فيليالىنىڭ ءوتىنىشى بويىنشا تەكسەرۋ جۇمىستارىن جۇرگىزەدى. سەبەبى، قايتىس بولعان ادامداردىڭ زەينەتاقىسىن پايدالانۋ دەرەگى توقتاماي تۇر. بۇل زەينەتاقى مەن جاردەماقى الاتىن ادامداردىڭ قايتىس بولعانى تۋرالى انىقتامانىڭ دەر كەزىندە تاپسىرىلماۋىنان بولىپ وتىر. الداعى ۋاقىتتا ىشكى ىستەر ورگاندارى مەن «ازاماتتارعا ارنالعان ۇكىمەت» اپتا سايىن اقپارات الماسىپ وتىرادى»، - دەدى اقتوبە وبلىستىق پروكۋراتۋراسىنىڭ اپپارات جەتەكشىسى جاسۇلان داۋلەمبايەۆ.
اۆتور: التىناي ساعىندىقوۆا
