كوپشىلىك استانادا 6 بالاسىن جالعىز اسىراپ جۇرگەن اكەگە ءۇي سالىپ، ءىشىن جيھازعا تولتىرىپ بەردى - فوتو، ۆيدەو
ول قۇرلىس كومپانيالارىنىڭ بىرىندە دانەكەرلەۋشى بولىپ ىستەيدى.
ماڭداي تەرىمەن تاپقان اقىسىنا 6 بالانىڭ تاماعى مەن كيىمىن بۇتىندەپ جۇرگەن اكە ءوز كۇشىمەن باسپانا سالۋدى قولعا العان. كىشى ۇلى وتكەن جىلى ميقۇرت (مەنينگيت) اۋرۋىمەن اۋىرىپ، ەسىتۋ قابىلەتىنەن ايىرىلىپتى.
وسى ماسەلەسىن ارىپتەستەرىنە ايتقانى سول ەكەن، ولار بىرىگىپ مۇحيت باتايەۆتىڭ ۇلىنىڭ ەمى مەن ۋاقىتشا پايدالاناتىن قۇرىلعىسىنىڭ اقىسىن تاۋىپ بەرىپتى، - دەپ حابارلايدى Stan.kz ءتىلشىسى.
«نامازحان جىگىتتەر مەنىڭ ماسەلەمدى الەۋمەتتىك جەلىدە جاريالاپتى. نەگىزى ىڭعايسىزداۋ بولدى. جۇرتتىڭ وسىنشالىقتى بارلىق زاتىمدى تۇگەندەپ بەرگەنىنە ۇيالىپ تا وتىرمىن. مەن كومەكتى بالامنىڭ دەرتى اسقىنىپ كەتكەندىكتەن سۇراعان بولاتىنمىن.
قازىر قۇجاتتارىن جيناپ جاتىرمىن. وتاعا كەزەككە تۇراتىن بولامىز. باستاعان ءۇيىمنىڭ قۇرلىسىنا كومەكتەسكەن، بالامنىڭ ەمىنە قول ۇشىن سوزعان، 6 بالامنىڭ تاماعى مەن كيىمىن، ۇيگە قاجەتتى دۇنيەمىزدى تولتىرىپ بەرگەن جومارت جاندارعا العىسىم شەكسىز.»، - دەيدى 6 بالانىڭ اكەسى.
6 بالانىڭ اناسى بەس جىل بۇرىن جول كولىك وقيعاسىندا قايتىس بولىپتى.
«تۋعان جەرىم تاراز. بارلىق وتباسىمىزبەن ءبىر كولىكتە كەلەجاتقانبىز. جول اپاتىندا ءبىز مىنگەن كولىك ءۇش اۋناپ ءتۇستى. بالالارىمنىڭ بارلىعى امان قالدى. تەك سۇيىكتى جارىمنان ايىرىلىپ قالدىق»، - دەيدى مۇحيت باتايەۆ.
6 بالانىڭ جاعدايىنا نەمقۇرايلى قاراماي جۇرتتى جۇمىلا كومەكتەسۋگە شاقىرعان- ەلميرا ەشنيازوۆا ەسىمدى انا. ونىڭ ءوزى 6 بالاسىن اكەسىز تاربيەلەپ كەلەدى. تاعدىرلاسى ىسپەتتەس مۇحيت باتايەۆتىڭ جاعدايىن كورگەندە قول قۋسىرىپ وتىرا الماعانىن ايتادى.
«مەن ايەل رەتىندە 6 بالانى جالعىز جەتكىزىپ جاتقاندىقتان مۇنداي تۇرمىستىق قيىندىقتاردى جاقسى بىلەمىن. قىزدار بوي جەتىپ، ۇلدار ەر جەتىپ كەلەجاتقان كەز. ولار وسكەن سايىن قاجەتتىلىك ارتادى.
ال ەر ادامنىڭ بالالارىن جالعىز قاراپ قالۋى قازىرگى كەزدە ەرلىكپەن تەڭ. ءبىز مۇحيت اعانىڭ وزىمەن، بالالارىمەن تانىسىپ، راسىمەن دە كومەككە مۇقتاج ەكەنىنە كوز جەتكىزدىك. مىنە وسىدان كەيىن جەلىدەن پاراقشا اشىپ، جۇرتتى كومەك قولىن سوزۋعا شاقىردىم»، - دەيدى ەلميرا ەشنيازوۆا.
قايىرىمدى جانداردىڭ ارقاسىندا كىشى باۋىرلارى ەم الىپ، ۇيلەرىنىڭ قۇرلىسى ءبىتىپ، ءىشى جيھاز بەن قاجەتتى تەحنيكاعا تولعان بالالاردىڭ قۋانىشىندا شەك جوق.
