ۆاتيكان مۋزەيىنە 6 - عاسىرداعى كونە قوبىزدىڭ كوشىرمەسى تاپسىرىلدى
«بابالار ىزىمەن ەكسپەديتسياسى ۆاتيكان مەملەكەتىنىڭ ارنايى قابىلداۋىندا بولدى. VI عاسىرعا جاتاتىن التايداعى قىپشاق قورعانىنان تابىلعان كونە قوبىزدىڭ كوشىرمەسىن ۆاتيكان مەملەكەتىنىڭ مۇراجايىنا تاپسىردىق» ، - دەپ جازادى تانىمال قازاقستاندىق ساياحاتشى ساپار ىسقاقوۆ ءوزىنىڭ فەيسبۋكتەگى پاراقشاسىندا.
قازاقستاندىق ساياحاتشىنىڭ ايتۋىنا قاراعاندا، جوعارىدا اتالعان ەكسپەديتسيا وكىلدەرى پاريجدىڭ جانىنداعى نوجان سۋر مارن قالاسى ءمەرىنىڭ ارنايى قابىلداۋىندا بولدى. مارتين مىرزا مۇستافا شوقايدىڭ اللەياسىن اشىپ، ەسكەرتكىشىن قويۋ باستاماسىن قولداپ، ارنايى جەر بولگەن ەكەن. ايتا كەتەيىك، 2017 -جىلدىڭ 4 - مامىرىندا ساپار ىسقاقوۆ جەتەكشىلىك ەتەتىن «بابالار ىزىمەن» اتتى عىلىمي ەكسپەديتسيا جولعا شىققان بولاتىن. ولار ەجەلگى عۇندار، تۇرىكتەر، قىپشاقتاردىڭ ءىزى قالعان الەمنىڭ 15 ەلىنە بارماق نيەتتە. 65 كۇنگە سوزىلاتىن بۇل ساپاردا ەكسپەديتسيا توبى قازاقستان، رەسەي فەدەراتسياسى (كاباردينو- بالقار رەسپۋبليكاسى، قاراشاي- شەركەش رەسپۋبليكاسى، داعىستان رەسپۋبليكاسى) ، ازەربايجان، ارمەنيا، گرۋزيا، ۋكراينا، مولدوۆا، سلوۆەنيا، بەلارۋس، ليتۆا، پولشا، گەرمانيا، فرانسيا، ۆەنگريا، يتاليا، ۆاتيكان جەرلەرىن ارالايدى جانە ارعى اتا- بابالارىمىزدىڭ ەجەلدەن قازىرگى زامانعا دەيىنگى كوشى- قون جاعدايىمەن تانىسىپ، د ن ق زەرتتەۋلەر جۇرگىزەدى.
اۆتور: گۇلسايا جاقان
