استانادا 6- شىلدەدە اقىندار ايتىسى وتەدى
ەلىمىزدىڭ ەڭ مىقتى سۋىرىپ سالما اقىندارى ءوزارا سىنعا تۇسەدى، دەپ حابارلايدى قالالىق اكىمدىكتەن.
ساحنا تورىندە وسى كەزگە دەيىن تالاي ايتىستاردا توپ جارعان، كوپشىلىككە كەڭىنەن تانىمال 12 اقىن ونەر كورسەتەدى. اتاپ ايتقاندا، ايبەك قاليەۆ، سارا توقتامىسوۆا، مەيىربەك سۇلتانحان، اسپانبەك شۇعاتايەۆ، ەركەبۇلان قاينازار جانە باسقالارى.
اقىندار ايتىسى اتاۋلى داتاعا ورايلاستىرىلىپ وتىرعاندىقتان، ايتىستىڭ باستى تاقىرىبى ەلىمىزدىڭ جەتىستىكتەرى مەن دامۋ پەرسپەكتيۆالارى، سونداي-اق، ەگەمەندى ەلىمىزدىڭ قالىپتاسۋ تاريحى بولماق.
اقىندار قوعامدى الاڭداتىپ وتىرعان وزەكتى ماسەلەلەردى جىرعا قوسادى. ايتىسكەرلەر ءوز ويلارىن سۇلۋ سوزبەن ءورىپ، تاپقىر ويدى ورنەكتى تىلمەن جەتكىزىپ، ءوز تىڭدارماندارىن قۋانتپاق.
«باعانالى وردام - باستى وردام» اقىندار ايتىسىنىڭ ءادىل قازىلار القاسىنىڭ قۇرامىنا تانىمال سۋىرىپ سالما اقىن، قازاق حالقى شىعارماشىلىعىنىڭ وسى ءبىر ەرەكشە ءتۇرىن زەرتتەپ جۇرگەن عالىم امانجول التايەۆ، ق ر حالىق اقىنى قونىسباي ءابىلوۆ، بەلگىلى ايتىسكەرلەر داۋلەتكەرەي كاپ ۇلى، سەرىكزات دۇيسەنعازين جانە باسقالارى ەندى.
ايتا كەتەيىك، ءداستۇر بويىنشا استانا قالاسىنىڭ اكىمدىگى اقىندار ايتىسىن ەلوردا كۇنىن مەرەكەلەۋ اياسىندا وسىمەن ونىنشى رەت وتكىزگەلى تۇر. جىل سايىن اقىندار «حان شاتىر» ساۋدا ويىن-ساۋىق ورتالىعىنىڭ جانىندا ورنالاسقان ساحنادا ونەر كورسەتەدى. بيىل ايتىس ەلوردامىزدىڭ ەڭ ۇزدىك كونسەرت زالدارىنىڭ ءبىرى - كونگرەسس- حولدا وتەدى.
