الماتىدا 6- ۇلتتىق قىسقى رەسپۋبليكالىق ۋنيۆەرسيادا اياقتالدى - فوتو
«ەلىمىزدىڭ جاس ستۋدەنت سپورتشىلارى 103 مەدالدار كەشەنىن ساراپقا سالدى. ولاردىڭ ىشىندە جەڭىس تۇعىرىنا ءۇش رەت كوتەرىلگەندەر دە بار. ۋنيۆەرسيادانى وتكىزۋگە جوعارى وقۋ ورىندارى مەن بەيىندى ۇيىمدار بەلسەنە اتسالىستى.
سولاردىڭ ارقاسىندا ۇلتتىق رەسپۋبليكالىق قىسقى ۋنيۆەرسيادا ويىندارى جوعارى دەڭگەيدە وتكىزىلدى. مۇنداي سپورتتىق شارالار ەلباسى ن. نازاربايەۆتىڭ قازاقستاندىقتاردىڭ كەم دەگەندە 30 پايىزىن بۇقارالىق سپورتپەن شۇعىلدانۋعا تارتۋ تۋرالى تاپسىرماسىن ورىنداۋعا جانە جاستار اراسىندا وسى بۇقارالىق سپورتتى كەڭىنەن ناسيحاتتاۋعا سەپتىگىن تيگىزەدى»، - دەدى ءوز سوزىندە ق ر ءبىلىم جانە عىلىم ۆيتسە-ءمينيسترى تاحير بالىقبايەۆ.
قازاقستاننىڭ ستۋدەنتتىك سپورت فەدەراتسياسىنىڭ پرەزيدەنتى قايرات زاكىريانوۆ حالىقارالىق ستۋدەنتتىك سپورت فەدەراتسياسى (FISU) جارىس بارىسىن مۇقيات باقىلاعانىن ايتا كەلە، وسى جارىستاردا جەڭىمپاز اتانعان سپورتشىلاردىڭ ەندى الداعى 2017-جىلى بولاتىن بۇكىل الەمدىك قىسقى ۋنيۆەرسيادا ويىندارىندا دا لايىقتى ونەر كورسەتىنىنە سەنىم ءبىلدىردى.
«وتكەن جىلى يسپانيا مەن سلوۆاكيادا وتكەن بۇكىل الەمدىك قىسقى ۋنيۆەرسيادا بارىسىندا ءبىزدىڭ كوماندا ءوز تاريحىندا تۇڭعىش رەت جالپى كوماندالىق ەسەپتە ءۇشىنشى ورىنعا يە بولدى. ال ەندى تۋعان جەرىمىزدە ءبىز كەم دەگەندە وسى جەتىستىگىمىزدى قايتالاۋىمىز كەرەك»، - دەدى ق. زاكىريانوۆ.
جارىس قورىتىندىسى بويىنشا ەڭ كوپ مەدال جيناعان قازاقتىڭ سپورت جانە تۋريزم اكادەمياسىنىڭ ستۋدەنتتەرى بولدى. پاۆلودار مەملەكەتتىك پەداگوگيكالىق ينستيتۋتى ەكىنشى ورىندى يەلەندى. ال ءۇشىنشى جالپى كوماندالىق ورىندى قازاق ۇلتتىق اگرارلىق ۋنيۆەرسيتەتى مەن م. قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ ستۋدەنتتەرى ءوزارا ءبولىستى.
ماراپاتتاۋ راسىمىنەن كەيىن قاتىسۋشىلار مەن قوناقتاردىڭ قۇرمەتىنە وتاندىق ەسترادا جۇلدىزدارىنىڭ قاتىسۋىمەن كونسەرت ۇيىمداستىرىلدى.
ايتا كەتەلىك، الماتىدا 6-17- اقپان ارالىعىندا وتكەن VI ۇلتتىق قىسقى رەسپۋبليكالىق ۋنيۆەرسيادا بارىسىندا 10 سپورت تۇرىنەن جارىستار بولدى. ولار: پرەزيدەنتتىك كوپسايىس، شاڭعى جارىسى، بياتلون، شورت-ترەك، تاۋ شاڭعى سپورتى، سنوۋبورد، قىسقى سپورتتىق باعدارلاۋ، شاڭعىمەن تۇعىردان سەكىرۋ، شايبالى حوككەي جانە كونكيمەن جۇگىرۋ. ويىندارعا رەسپۋبليكا بويىنشا 35 جوعارى وقۋ ورىندارىنان قۇرامىندا جالپى سانى 1072 سپورتشى بار 141 سپورت كوماندالارى قاتىسىپ، 103 التىن، 103 كۇمىس جانە 103 قولا مەدالدى ساراپقا سالدى.
