دۇنيەجۇزىلىك بانك قازاقستانعا 6 ميلليارد ا ق ش دوللارىن بولەدى - ۇلتتىق ەكونوميكا ۆيسە- ءمينيسترى
بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆا دۇنيەجۇزىلىك بانكتىڭ قازاقستانداعى تۇراقتى وكىلى ليۋدميلا بۋتەنكومەن كەزدەسۋى الدىندا تىلشىلەرگە بەرگەن سۇحباتىندا ق ر ۇلتتىق ەكونوميكا ۆيسە- ءمينيسترى ءمادينا ءابىلقاسىموۆا وسىلاي ءمالىم ەتتى.
ەستەرىڭىزگە سالا كەتەيىك، 2014 - جىلدىڭ مامىرىندا ق ر ۇكىمەتى مەن دۇنيەجۇزىلىك بانك اراسىندا ەلىمىزدىڭ ورنىقتى دامۋىنا جاردەمدەسۋ ماقساتىندا ىنتىماقتاستىقتى كۇشەيتۋدىڭ ارىپتەستىك كەلىسىمىنە قول قويىلدى. وسى نەگىزدەمەلىك كەلىسىمنىڭ اياسىندا 2015-2017 -جىلدارى اتالعان بانك 6 ميلليارد ا ق ش دوللارى شاماسىندا زايمدار مەن تەحنيكالىق كومەك ۇسىناتىن بولادى.
ۆيسە- ءمينيستردىڭ ايتۋىنشا، بىرىنشىدەن، ەلباسىنىڭ «نۇرلى جول - بولاشاققا باستار جول» جولداۋىنا سايكەس، دۇنيەجۇزىلىك بانكپەن بىرلەسىپ 3 ميلليارد 746 ملليون دوللارعا كولىك- لوگيستيكالىق ينفراقۇرىلىمدى دامىتۋ جوبالارى جۇزەگە اسىرىلادى. وسىنىڭ اياسىندا «ورتالىق- باتىس»، «ورتالىق- وڭتۇستىك» جوبالارى قامتىلادى.
ال ەكىنشى باعىت بويىنشا شاعىن جانە ورتا بيزنەستى قولداۋ جانە ينۆەستيتسيالىق احۋالدى جاقسارتۋ اياسىنداعى جوبالار جۇزەگە اسىرىلادى. بۇل تۇرعىدا 200 ميلليون دوللار سوماسىندا دۇنيەجۇزىلىك بانك تاراپىنان شوب- تى قارجىلاندىرۋ ءۇشىن نەسيەلىك جەلىلەر ۇسىنىلادى. سونىمەن قاتار 246 ميلليون دوللارعا بيزنەستىڭ باسەكەلەستىگىن ارتتىرۋ مەن ينۆەستيتسيالاردى تارتۋ بويىنشا ينستيتۋتسيونالدىق كومەك كورسەتىلەدى.
ۇشىنشىسىندە، قورشاعان ورتانى قورعاۋ مەن سۋ رەسۋرستارى بويىنشا 363,1 ميلليون دوللاردىڭ جوبالارى ىسكە اسىرىلادى. وسى باعىتتا سىرداريا وزەنى ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ، قالدىقتار ماسەلەسى، ورمانداردى القاپتاردى ارتتىرۋ شارالارى قامتىلعان.
اۆتور: رۋسلان عابباسوۆ
