شۇعىل: الماتىدا اتىس بولىپ 6 قىلمىسكەردىڭ كوزى جويىلدى
بۇل تۋرالى ق ر باس پروكۋراتۋراسىنىڭ باسپاءسوز قىزمەتىنەن ءمالىم ەتتى.
بۇعان دەيىن حابارلانعانداي، 2012 - جىلعى 28 - شىلدەدە الماتى قالاسىنىڭ بەكماحانوۆ كوشەسىندە پوليسيا قىزمەتكەرلەرىنە قارۋلى شابۋىل جاسالعان بولاتىن.
ناتيجەسىندە، پوليسيا اعا لەيتەنانتى ەرجان قايراقبايەۆ سول جەردە قازا تاۋىپ، ال پوليسيا لەيتەنانتى ەرناز كوجاحمەتوۆ باسىنا وق ءتيىپ، جاراقاتتانىپ اۋرۋحاناعا جاتقىزىلعان ەدى.
وقيعا بولعان جەردەن قىلمىسكەرلەر پوليسەيلەردىڭ تابەلدىك قارۋلارىن (ءبىر كالاشنيكوۆ اۆتوماتى جانە ءبىر ماكاروۆ جۇيەسىنىڭ تاپانشاسى) الىپ كەتكەندىگى بەلگىلى بولدى.
وسى وقيعا بويىنشا سول كۇنى ىشكى ىستەر ورگاندارىمەن قىلمىستىق كودەكستىڭ 96-بابى بويىنشا (كىسى ءولتىرۋ) قىلمىستىق ءىس قوزعالدى.
جەدەل-تەرگەۋ ءىس-شارالارىن جۇرگىزۋ بارىسىندا قىلمىسقا قاتىستى كۇدىكتىلەر انىقتالدى. ولار بۇرىن اۋىر قىلمىستار جاساعاندارى ءۇشىن سوتتى بولعان تۇلعالار.
سونداي-اق، ولار جازالارىن ءبىر تۇزەۋ مەكەمەسىندە وتەپ، بوستاندىققا شىققاننان كەيىن قاراقشىلىق توپ قۇرعاندىقتارى انىقتالدى.
پوليسيا قىزمەتكەرلەرىنە شابۋىل جاسالعان كۇنى اتالعان توپ مۇشەلەرى وقيعا بولعان جەرگە جاقىن ماڭدا ورنالاسقان تاۋار ساقتاۋ قويماسىنا قاراقشىلىق شابۋىل جاساۋدى جوسپارلاعان.
ولاردىڭ قىلمىستىق جوسپارلارىن جۇزەگە اسىرۋعا قالانىڭ وسى اۋدانىندا قىزمەت اتقارىپ جۇرگەن پوليسيا قىزمەتكەرلەرى بوگەت جاساعان. وسىلايشا، قىلمىسكەرلەردەن سەزىكتەنگەن پوليسەيلەر ولاردىڭ قۇجاتتارىن تەكسەرىپ، جەكە باستارىن انىقتاۋ تۋرالى شەشىم قابىلدايدى. الايدا، قاراقشىلىق توپ مۇشەلەرى ولارعا قارسى وق اتقان.
بۇگىن، 2012 - جىلعى 30 - شىلدەدە ىشكى ىستەر ورگاندارىنىڭ جەدەل بولىمشەلەرى قىلمىستىق توپ مۇشەلەرىنىڭ «احسەل كەنت» ىقشام اۋدانىنداعى №37 ءۇيدىڭ پاتەرلەرىنىڭ بىرىندە جاسىرىنعاندىعىن انىقتاپ، ولاردى وقشاۋلاندىردى.
وسى جانە جاقىن ورنالاسقان ۇيلەردىڭ تۇرعىندارى قاۋىپسىز جەرگە جەتكىزىلدى.
قارۋلى قىلمىسكەرلەردى ۇستاۋ بويىنشا ارنايى وپەراسيا جۇرگىزۋ كەزىندە ولار بەرىلۋدەن باس تارتىپ، ارنايى بولىمشە قىزمەتكەرلەرىنە قاراي وق اتا باستادى.
قارسى اتىسپەن بارلىق 6 قىلمىسكەر جويىلىپ، وقيعا بولعان جەردەن اتىس قارۋ-جاراقتارى تابىلىپ، الىندى.
بەيبىت تۇرعىندار جانە قۇقىق قورعاۋ ورگاندارىنىڭ قىزمەكەرلەرى اراسىندا قازا بولعاندار مەن جابىرلەنۋشىلەر جوق.
وقيعا بولعان جەردە شۇعىل تەرگەۋ ارەكەتتەرى جۇرگىزىلۋدە.
