نۇر- سۇلتاندا 692 مەديتسينالىق قىزمەتكەر قوناق ۇيگە ورنالاسىپ، قىزمەتىن اتقارۋدا

«ەلوردادا كوروناۆيرۋس ينفەكتسياسىنىڭ تارالۋىنا جول بەرمەۋ ءۇشىن ءبىرقاتار شارا قابىلدانىپ جاتىر. سونداي شارالاردىڭ ءبىرى - مەديتسينا قىزمەتكەرلەرىن قالانىڭ قوناق ۇيلەرىنە ورنالاستىرۋ. قازىرگى ۋاقىتتا 692 مەديتسينالىق قىزمەتكەر قوناق ۇيلەردە. دەمالعاننان كەيىن قايتادان ءبارى جۇمىسقا بارادى» ، - دەدى ساۋلە قيسىقوۆا «حابار 24» ارناسىندا ونلاين رەجيمدە وتكەن باسپا ءسوز ءماسليحاتىندا.

باسقارما باسشىسى كەلتىرگەن مالىمەتكە سايكەس، قالادا كوروناۆيرۋس جۇقتىرعان ازاماتتارمەن بايلانىستا بولعان 4129 ادام انىقتالعان. 309 ۆيرۋس وشاعىندا دەزينفەكسيالىق جۇمىستار جۇرگىزىلگەن. «قالادا كوروناۆيرۋس ينفەكسياسى العاش تىركەلگەن ساتتەن باستاپ 48 نىسان كارانتينگە جابىلدى. ولاردىڭ ىشىندە تۇرعىن ءۇي كەشەندەرى، اكىمشىلىك مەكەمەلەر مەن وزگە دە نىساندار بار. ولاردىڭ ىشىندە 26 نىساندا كارانتين اياقتالدى. بۇگىنگى كۇنى 22 نىسان ءالى كارانتيندە. كارانتينگە جابىلعانداردىڭ ىشىندە - ايتۋىنشا «شاراپات» الەۋمەتتىك قىزمەت كورسەتۋ ورتالىعى دا بار» ، - دەدى ول. باسقارما باسشىسى سونىمەن قاتار قالانىڭ جەكەلەگەن بولىكتەرىندە شەكتەۋ ەنگىزۋ تۋرالى قاۋلى شىققانىن ايتىپ ءوتتى. «قالادا 9 ءۇي كارانتين قورشاۋىنا الىندى. كارانتيندىك اۋماقتاردا بۇگىن اسكەريلەرمەن بىرگە 200 گە تارتا ادام دەزينفەكتسيا جۇمىستارىن جۇرگىزدى. 2800 ۇيدە دە دەزينفەكسيا جاسالدى. ەپيدەميولوگيالىق احۋال باقىلاۋدا» ، - دەپ ءتۇيدى ساۋلە قيسىقوۆا. ايتا كەتسەك، بۇعان دەيىن ساۋلە قيسىقوۆا ەلوردادا قازىرگى تاڭدا كوروناۆيرۋس ينفەكتسياسىن جۇقتىرعان 9 ادام اۋىر حالدە جاتقانىن ءمالىم ەتكەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى