قاراعاندىداعى قۇس فابريكاسى جۇمىرتقانىڭ شامادان تىس كوپ بولۋىنا بايلانىستى، 68 مىڭ مەكيەن تاۋىقتى سويىپ تاستادى

 كاسىپورىنداعىلار، سۋبسيديا (كومەك قارجى) الا الماي قالۋىنا بايلانىستى، جۇمىرتقا ءوندىرۋدىڭ قىمباتقا ءتۇسىپ جاتقانىن ايتتى.

 دايىن ونىمدەر قويماسى لىق تولىپ تۇر. سويتسە، ايماقتاعى 3 ءىرى قۇس فابريكاسى مەملەكەتتىك سۋبسيديادان قاعىلىپتى. وندىرۋشىلەردىڭ ايتۋىنشا، اۋىل شارۋاشىلىعى مينيسترلىگى ولارعا 400 ميلليون تەڭگە بەرەشەك ەكەن.

 «قاراعاندى قۇس» فابريكاسى وسىدان 5  جىل بۇرىن «بيزنەستىڭ جول كارتاسى 2020» باعدارلاماسى اياسىندا اشىلعان- دى. قاراعاندىلىق مەكيەن تاۋىقتار ءونىمىن ەلدىڭ كوپتەگەن ايماعىنداعى دۇكەن سورەلەرىنەن كەزدەستىرۋگە بولادى. فابريكانىڭ 5 قۇس قوراسى بار. جىلىنا 100 ميلليوننان اسا جۇمىرتقا وندىرەدى. الايدا، وتكەن جىلى ءوندىرىس السىرەپ قالدى.

 اسەل قاليەۆا، «قاراعاندى قۇس» ج ش س ديرەكتورى:

 ءبىز 2014 - جىلى سۋبسيديا المادىق. شامامەن 118 ميلليون تەڭگە. قاراعاندى وبلىسىندا دا ءدال وسىنداي جاعداي. ءبىز باعا بويىنشا ءتيىمسىز جاعدايدا قالىپ وتىرمىز. سوندىقتان قۇس قوراسىنىڭ بىرەۋىن جويۋعا تۋرا كەلدى.

 ۇزدىكسىز جۇمىس ىستەپ جاتقان ءوندىرىس - تاۋىق سانىن قاداعالاپ جانە ازايتىپ الەك. قويماداعى دايىن ونىمدەر 4 ەسە ارتىعىمەن جينالىپ تۇر. ال جۇمىرتقالاردى تيەپ الىپ كەتۋشىلەر از. بۇرىندارى ونى تەك ورتالىق قازاقستان عانا ەمەس، وڭتۇستىك ايماقتار دا ساتىپ الاتىن. ال قازىر سۋبسيديا بولماعاندىقتان، باعا باسەكەلەستىككە توتەپ بەرە الماي جاتىر. ايتپەسە، قۇس وسىرۋشىلەردىڭ دايىن ونىمدەردى ساتقىلارى- اق كەلەدى.

 بۇگىندە «قاراعاندى قۇستاعى» جۇمىرتقا داناسىنىڭ وزىندىك قۇنى - 14 تەڭگە. قۇستىڭ جەمى، ونى باپتاۋ، قۇرالداردى جوندەۋ شىعىندارى جانە جۇمىسشىلاردىڭ جالاقىسى دا وسى اقشادان. بۇل سومانىڭ 3 تەڭگەسىن 2013 - جىلى مەملەكەت كومپەنساسيالاعان ەدى. قاراعاندى وبلىستىق اۋىل شارۋاشىلىعى باسقارماسىنداعىلار بۇل ماسەلەگە قانىق. قولدارىنان كەلگەنشە، كومەكتەسەمىز، دەيدى.

 باۋىرجان اسانوۆ، قاراعاندى وبلىستىق اۋىل شارۋاشىلىعى باسقارماسىنىڭ باسشىسى:

 مالىمدەگەن قاراجات نەگىزىندە بىزگە قارجى جەتپەي قالدى. سوعان قاراماستان، ءبىزدىڭ قۇس وسىرۋشىلەرىمىز بارلىق سۋبسيديانىڭ 63 پايىزىن الدى.

 سونداي- اق، باسقارماداعىلار، سيىر ەتىن وندىرەتىندەر نەبارى 55 پايىز، ال ءسۇت وندىرۋشىلەر ودان دا از - 45 پايىز - سۋبسيديا العانىن، ايتتى. «اۋىر جىل بولدى. سوندىقتان اۋىل شارۋىشىلىعى مينيسترلىگى بارلىعىن تولىق كولەمدە قارجىلاندىرا المادى»، - دەيدى.

وتكەن جىل قيىن بولعانمەن، 2015 تە جاعداي تۇراقتانباق. شەنەۋنىكتەر، سۋبسيديا كولەمىن ارتتىرامىز، قازىردىڭ وزىندە وتىنىشتەر بار، دەيدى. ال «قاراعاندى قۇس» فابريكاسىنداعىلار ۋادەگە سەنىپ، قاراپ وتىرعان جوق. ولار جۇمىس ورىندارى مەن تاۋىقتاردى ساقتاپ قالۋعا تىرىسىپ باعۋدا. جانە ەكونوميكانىڭ جاڭا بەلەسىنە دايىندىق ۇستىندە.

«استانا» ارناسى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى