68 بالانىڭ ءومىرىن قيعان ءشاربات: وزبەكستاندا قاۋىپتى ءدارىنى ساتقاندارعا ۇكىم شىقتى
تاشكەنت. KAZINFORM - تاشكەنت قالالىق قىلمىستىق سوتى «دوك-1 ماكس» پرەپاراتى توڭىرەگىندەگى ءىس بويىنشا ايىپتالۋشىلارعا ۇكىم شىعاردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
وزبەكستان جوعارعى سوتىنىڭ مالىمەتىنشە، ىسكە ءتوراعالىق ەتۋشى سۋديا مۋسا يۋسۋپوۆ فارماتسيەۆتيكا سالاسىن دامىتۋ اگەنتتىگىنىڭ بۇرىنعى باسشىسى ساردور كاريەۆتى كىنالى دەپ تانىدى. وعان ءور قىلمىستىق كودەكسىنىڭ 186-3-بابى 4-بولىگىنىڭ «ا» جانە «ب» تارماقتارى بويىنشا (قۇرامىندا ادام ولىمىنە اكەپ سوققان كۇشتى اسەر ەتەتىن كومپونەنتتەرى بار دارىلىك زاتتاردى بولشەك ساۋدادا وتكىزۋ ءتارتىبىن بۇزۋ) جانە 209-باپتىڭ 2-بولىگىنىڭ «ا» تارماعىنا ساي ۇكىم شىعارىلدى.
ونىڭ 2 جىل 6 اي مەرزىمگە مەملەكەتتىك ورگانداردا باسشىلىق لاۋازىمداردا جۇمىس ىستەۋ قۇقىعى شەكتەلىپ، 18 جىلعا باس بوستاندىعىنان ايىرىلدى. جازا مەرزىمىن ەسەپتەۋ 2023 -جىلدىڭ 24-قاڭتارىنان (قاماۋعا الىنعان كۇن) باستالادى.
ونىڭ ورىنباسارلارى اميرحون ازيموۆ پەن نوديربەك مۋسايەۆ 2 جىل 6 اي ىشىندە مەملەكەتتىك ورگانداردا باسشىلىق لاۋازىمداردا جۇمىس ىستەۋ قۇقىعىنان ايىرىلىپ، 16 جىلعا سوتتالدى.
ال Quramax Medikal ج ش ق ديرەكتورى بولعان ءۇندىستان ازاماتى راگۆەندرا پراتارعا 20 جىلعا باس بوستاندىعىنان ايىرۋ جازاسى كەسىلدى.
سوت ۇكىمىنە سايكەس، ايىپتالۋشىلار اتالعان ءدارىنىنىڭ سالدارىنان كوز جۇمعان 68 بالا مەن اۋىر حالدە جاتقان 4 بالانىڭ وتباسىنا 1 ميلليارد سۋم (35,9 ميلليون تەڭگە) وتەماقى تولەۋى ءتيىس.
ال دەنساۋلىق جاعدايى ورتاشا دەپ باعالانعان جابىرلەنۋشىلەرگە 500 ميلليون سۋم (17,9 ميلليون تەڭگە)، ساۋىعىپ شىققان 8 بالاعا 200 ميلليون سۋمنان (7,1 ميلليون تەڭگە) بەرىلەدى.
ەسكە سالايىق، 2022 -جىلى جەلتوقساندا وزبەكستان دەنساۋلىق ساقتاۋ مينيسترلىگى «دوك-1 ماكس» پرەپاراتىن قابىلداعان 18 بالانىڭ كوز جۇمعانىن راستايتىن تەكسەرۋ ناتيجەسىن جاريالادى.
اتاپ ايتقاندا، دارىلىك زاتتاردى ساراپتاۋ جانە ستاندارتتاۋ مەملەكەتتىك ورتالىعىنىڭ قورىتىندىسىنا سايكەس، «دوك-1 ماكس» ءشارباتى بەلگىلەنگەن تالاپتارعا ساي بولماي شىققان. كەيىن ونى ساتۋعا ۋاقىتشا تىيىم سالدى.
اراعا بىرنەشە كۇن سالىپ، وزبەكستاننىڭ مەملەكەتتىك قاۋىپسىزدىك قىزمەتى (م ق ق) بالالاردىڭ تۇماۋعا قارسى ءۇندى دارىسىنەن كەيىن كوز جۇمۋ وقيعاسىنا قاتىستى قىلمىستىق ءىس قوزعادى.
قوسا كەتسەك، ق ر دەنساۋلىق ساقتاۋ مينيسترلىگى وزبەكستاندا بالالاردىڭ ولىمىنە سەبەپ بولعان «دوك-1 ماكس» پرەپاراتىنىڭ ەلىمىزدە ساتىلمايتىنىن ءمالىم ەتكەن بولاتىن.
