جاسى 66 داعى سپورتشى ۇشكەمپىروۆ سپورتتىق بابىندا ەكەنىن دالەلدەپ بەردى - فوتو
الماتى قالاسىندا وتكەن شەبەرلىك ساعاتىندا قارت بالۋان جاس بالۋانداردىڭ ءبىرىن الىپ جىقتى. 65 تى ەڭسەرگەن چەمپيون زالعا جينالعان 200 دەن استام جاس بالۋاندارعا كۇرەستىڭ قىر- سىرىن پاش ەتتى. داڭقتى بالۋان مۇنىمەن قوسا سۇراقتارعا جاۋاپ بەرىپ، ءوزىنىڭ قيىن سپورتتىق ءومىرى تۋرالى ايتىپ بەردى، دەپ حابارلايدى dodasport.kz.
- بۇگىن مەنىڭ ومىرىمدەگى ەڭ ءبىر قىزىقتى ەستە قالارلىق وقيعا بولدى، - دەپ جاقسىلىق ۇشكەمپىروۆ شەبەرلىك ساعاتىنان العان اسەرىمەن ءبولىستى. جاس بالۋانداردىڭ كۇرەسكە دەگەن قۇشتارلىعىن وياتۋ ءۇشىن بۇنداي شارالاردى ءجيى وتكىزىپ وتىرۋ كەرەك.
تەك قالالاردا عانا ەمەس، اۋىلدىق جەرلەردە دە وتكىزگەن دۇرىس. سوندا عانا ەلىمىزدە وليمپيادا چەمپيوندارى مەن الەم چەمپيوندارى ءوسىپ شىعادى. بۇل جاستارعا ۇلگى بولادى. ماعان سۇراقتار قويىلعان كەزدە مەن بالالىق شاعىما ورالعانداي بولامىن.
بۇگىنگى كەزدەسۋگە ريزامىن. بۇگىنگى جاس ەرتەڭ بىزگە ۇقساعان چەمپيون بولسا ەكەن دەگەن تىلەگىم بار، - دەدى بالۋان. ونىمەن قوسا وليمپيادا چەمپيونى الماتى تۇعىندارىنا «حالىق ارەنادا» اشىلعان تەگىن كۇرەس ۇيىرمەلەرىنە بارۋعا كەڭەس بەردى.
بۇل شارا الماتى قالاسىندا باستاۋ العان تەگىن كۇرەسپەن اينالىسۋ ناۋقانىنا بايلانىستى وتكەن بولاتىن. 
ايتا كەتەيىك، وسى سەكىلدى شەبەرلىك ساعاتتارى 10 كۇن سايىن وتكىزىلىپ تۇرادى. وعان وليمپيادا چەمپيوندارى، الەم بىرىنشىلىكتەرىنىڭ جەڭىمپازدارى مەن ءتۇرلى حالىقارالىق دودالاردا توپ جارىپ جۇرگەن بالۋاندارىمىز قاتىسادى. بۇدان بۇرىن داڭقتى بالۋاندارىمىزدىڭ ءبىرى داۋلەت تۇرلىحانوۆ شەبەرلىك ساعاتىن وتكىزگەن بولاتىن.
