قىتايدا كوروناۆيرۋس جۇقتىرعان ادامداردىڭ 65 پايىزى ەمدەلىپ شىقتى

«كوروناۆيرۋسقا قاتىستى كۇندەلىكتى اقپاراتتاردى ۋاقتىلى بەرىپ جاتىرمىز. وكىنىشكە قاراي، سوعان قاراماستان حالىق اراسىندا، الەۋمەتتىك جەلىلەردەن ءارتۇرلى مالىمەتتەر كەلۋدە. مىسالى بۇگىن ۋاتساپتا «نۇر- سۇلتاندا ەكى قىتاي ازاماتى قايتىس بولدى» دەگەن، كەشە «الماتىدا اۋرۋ قىتاي ازاماتتارى ەمدەلىپ جاتىر» دەگەن دە جالعان اقپارات تارادى. وڭىرلەردەن دە وسىنداي اقپارات كەلىپ جاتىر. ءبىزدىڭ نەگىزگى مىندەتىمىز - ەلىمىزدەگى ءتۇرلى اۋرۋدان، ينفەكسيادان قورعاۋ، اشىق ءارى تولىق اقپارات بەرۋ»، - دەدى مينيستر و ك ق- دا وتكەن باسپا ءسوز ءماسليحاتىندا.

ەلجان ءبىرتانوۆ كوروناۆيرۋس بويىنشا قازىرگى الەمدەگى احۋال تۋرالى دا مالىمەتتەرمەن ءبولىستى.

«قىتايدا 80 مىڭنان استام ناۋقاس تىركەلدى. سوڭعى كۇندە 0,18 پايىز قوسىمشا وسىممەن ناۋقاستاردىڭ تىركەلگەنى بەلگىلى بولىپ وتىر. ءبىراق اۋرۋحانالاردان شىققان ازاماتتاردىڭ سانى 52 مىڭنان استى. ياعني بۇكىل ناۋقاستىڭ 65 پايىزى ەمدەلىپ شىقتى. وكىنىشكە قاراي دۇنيە جۇزىندەگى 79 مەملەكەتتە 14 مىڭنان استام ناۋقاس تىركەلدى. قازىرگى تاڭدا قازاقستاندا كوروناۆيرۋس ينفەكسياسىمەن ناۋقاستانعان ادامدار تىركەلمەدى. مۇنداي دياگنوز ءالى ەشكىمگە قويىلعان جوق»، - دەدى ول.

مينيستر ءوز سوزىندە 20 - اقپاننان باستاپ كوروناۆيرۋس ينفەكسياسى بويىنشا قاۋىپتى مەملەكەتتەر ءۇش ساناتقا بولىنگەنىن ەسكە سالدى.

«وسى ساناتتار بويىنشا باقىلاۋ جۇمىستارى جۇرگىزىلۋدە. ا جانە ب ساناتتارى بويىنشا 900-دەن استام ازامات كارانتينگە جاتقىزىلدى. ءۇشىنشى ساناتتاعى 7515 ازامات باقىلاۋدا. جالپى ءتۇرلى مەملەكەتتەن كەلگەن 8 مىڭعا تارتا ازامات قازىر ءبىزدىڭ دەنساۋلىق ساقتاۋ مينيسترلىگىنىڭ باقىلاۋىندا. اۋرۋ باستالعالى بەرى ءبىزدىڭ ارنايى ۇلتتىق ساراپشىلىق لابوروتوريا ءۇش مەملەكەتتەن قاجەتتى لابوروتورلىق تەستتى الدى. قازىرگى كۇنى 11 مىڭ ادام تەكسەرىس تەستىنەن ءوتتى. بارلىق تەست ناتيجەسى جاقسى. كوروناۆيرۋس تابىلمادى»، - دەدى ول.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى