65 فەرما ىسكە قوسىلسا ەلدە وندىرىلەتىن ءسۇت كولەمى ارتادى - سەرىك جۇمانعارين
پرەمەر-ءمينيستردىڭ ورىنباسارى سەرىك ءجۇمانعاريننىڭ توراعالىعىمەن وتكەن كەڭەستە قازاقستاندا تاۋارلى ءسۇت فەرمالارىن سالۋ جونىندەگى ۇلكەن جوبانىڭ ىسكە اسىرىلۋ بارىسى تالقىلاندى، دەپ حابارلايدى Kazinform ۇكىمەتتىڭ رەسمي سايتىنا سىلتەمە جاساپ.
بيىل ەلىمىزدە 65 تاۋارلى ءسۇت فەرماسى جۇمىسىن باستاۋى كەرەك. ولاردىڭ اراسىندا جاڭا جانە ءوندىرىس قۋاتىن ارتتىرۋدى كوزدەپ وتىرعان تاۋارلى ءسۇت فەرمالارى بار. كاسىپورىنداردىڭ بارلىعى ينۆەستيتسيالىق جوبالار پۋلىنا كىردى، ول ءوز كەزەگىندە 10 جىل مەرزىمگە %2,5 جەڭىلدىكپەن قارىز الۋ مۇمكىندىگىن بەرەدى.
ەسكە سالا كەتەيىك، 2023 -جىلى مەملەكەت وسى ماقساتتارعا 100 ميلليارد تەڭگە ءبولدى.
كەڭەستە اۋىل شارۋاشىلىعى ۆيتسە- ءمينيسترى ەربول تاسجۇرەكوۆ حابارلاعانداي، الەۋەتى بار جوبالار پۋلىن قالىپتاستىرۋ جۇمىستارى وتكەن جىلعى ءساۋىر ايىندا باستالعان بولاتىن. بارلىق قاجەتتى قۇجاتتار قابىلدانعاننان كەيىن ۇلكەن جوباعا قاتىسۋشى 11 وڭىرگە ا ك ك ارقىلى جوبالاردى جەڭىلدىكپەن نەسيەلەۋ ءۇشىن قاراجات باعىتتالدى.
100 ميلليارد تەڭگە كولەمىندەگى كەلەسى ترانش 2024 -جىلى بولادى دەپ كۇتىلەدى. مەملەكەت اۋىل شارۋاشىلىعى جەرلەرىن سۋارۋ، قۇس فابريكاسىن، كوكونىس جانە جەمىس قويمالارىن سالۋ، سونداي-اق ەت وندىرۋگە ماماندانعان مال شارۋاشىلىعى جوبالارىن قارجىلاندىراتىن بولادى.
ۆيتسە-پرەمەر سەرىك جۇمانعارين ۇلكەن جوباعا قاتىسۋشى بارلىق ءوڭىر وكىلدەرىن تىڭدادى. كاسىپورىندار پۋلىن انىقتاۋ جانە قارجىلاندىرۋ بويىنشا كەدەرگىلەردى جويۋ ماسەلەلەرى ەگجەي-تەگجەيلى تالقىلاندى.
«2024 -جىلى پايدالانۋعا بەرۋ جوسپارلانىپ وتىرعان بىردە-ءبىر جوبانى 2025 -جىلعا قالدىرۋعا بولمايدى. ۇلكەن جوباعا بولىنگەن مەملەكەت قاراجاتى ءبىرىنشى كەزەكتە ەلىمىزدە تاۋارلى ءسۇت ءوندىرىسىن ايتارلىقتاي ۇلعايتۋ ءۇشىن 65 فەرمانى ىسكە قوسۋدى كوزدەيدى. ءاربىر جوبانى ارنايى كوميسسيا تەكسەرەدى. ءسۇت فەرمالارىن سالۋ - ۇلكەن جوبانىڭ ءبىر بولىگى عانا، باسقا دا وندىرىستەر پۋلىن ازىرلەپ باستاۋ قاجەت. وڭىرلەرگە اقپان ايىنىڭ سوڭىنا دەيىن بارلىق جوبا بويىنشا شەشىم قابىلداۋدى تاپسىرامىن»، - دەدى ۆيتسە-پرەمەر.
