ارمەنيادا كوروناۆيرۋس جۇقتىرعاندار سانى 64 كە جەتتى

پرەمەر-مينيستر نيكول پاشينياننىڭ ايتۋىنا قاراعاندا، ناۋقاستار سانىنىڭ ارتۋى ۆيرۋستى جۇقتىرعاندارمەن بايلانىستا بولعان جانە بىرگە وقشاۋلانىپ جاتقان ادامداردى تەستتەن وتكىزۋمەن بايلانىستى.

وسى كۇنگە دەيىن ارمەنيادا كوروناۆيرۋس جۇقتىرۋدىڭ 64 وقيعاسى انىقتالدى. «17- ناۋرىز كۇنى ساعات 12:00 دەگى (نۇر-سۇلتان ۋاقىتىمەن ساعات 14:00) جاعداي بويىنشا، تەستىلەۋدەن كەيىن ۆيرۋستى جۇقتىرۋدىڭ جاڭادان 12 وقيعاسى تىركەلدى. ونىڭ التاۋى ەچميادزين قالاسىندا بولسا، قالعان التاۋى ەركۆەندەگى كاسىپورىن جۇمىسشىلارى. بارلىق ناۋقاس باستاپقىدا وقشاۋلانعان. قازىرگى ۋاقىتتا بىزدە 64 جاعداي تىركەلدى، ونىڭ بىرەۋى جازىلىپ كەتتى»، - دەدى ارمەنيا دەنساۋلىق ساقتاۋ مينيسترلىگىنىڭ باسپا ءسوز قىزمەتىنەن.

سونداي-اق، توتەنشە جاعداي رەجيمى جاعدايىندا جۇمىس ىستەيتىن كومەنداتۋرانىڭ باسشىسى، ۆيتسە-پرەمەر تيگران اۆينيان 17- ناۋرىزدان باستاپ ارمەنياعا كىرۋگە تىيىم سالىناتىن ەلدەردى اتادى. بۇل ەلدەردەن كەلگەن ارمەنيا ازاماتتارى مىندەتتى تۇردە ەكى اپتالىق كارانتيننەن ءوتۋى كەرەك. بۇل مەملەكەتتەرگە قىتاي، يران، وڭتۇستىك كورەيا، جاپونيا، يتاليا، يسپانيا، فرانسيا، گەرمانيا، شۆەيتساريا، دانيا، اۆستريا، بەلگيا، نورۆەگيا، شۆەتسيا، نيدەرلاندى، ۇلى بريتانيا كىرەدى.

ەسكە سالايىق، ارمەنيادا كوروناۆيرۋس جۇقتىرعان العاشقى جاعداي 1- ناۋرىزدا تىركەلدى. ەكى اپتالىق كارانتيننەن كەيىن ناۋقاس اۋرۋحانادان جازىلىپ شىققان. ەل ۇكىمەتى 16- ناۋرىز بەن 14- ءساۋىر ارالىعىندا توتەنشە جاعداي ەنگىزدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى