ەلوردادان ەكىباستۇزعا 64 وتباسى كوشىپ باردى

«كوپبالالى وتباسىلار ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021-جىلدارعا ارنالعان «ەڭبەك» مەملەكەتتىك باعدارلاماسىنا وراي قونىس اۋدارۋدا.

نۇر-سۇلتان قالاسى وسى باعدارلاماعا بيىل ەنگىزىلىپ وتىر. پاۆلودار، س ق و، قوستاناي، ش ق و سەكىلدى يندۋسترياسى دامىعان، جۇمىس كۇشىنە قاجەتتىلىك سەزىنەتىن وڭىرلەرمەن كەلىسسوزدەر جۇرگىزىلىپ جاتىر»، - دەدى بۇگىن نۇر-سۇلتان قالاسى اكىمىنىڭ ورىنباسارى ەرلان كاناليموۆ ورتالىق كوممۋنيكاتسيالار قىزمەتىندە.

ونىڭ ايتۋىنشا، وتباسىلاردى قابىلداۋعا ءۇي-جايلارى مەن ينفراقۇرىلىمى دايىن وڭىرلەردىڭ العاشقىسى پاۆلودار وبلىسىنىڭ ەكىباستۇز قالاسى بولدى.

«سوندىقتان وسى باعدارلامانى قولداۋعا شەشىم قابىلداندى. ونىڭ ۇستىنە، بىزدە قونىس اۋدارعىسى كەلەتىندەر دە بار. باعدارلاماعا ەڭ الدىمەن، باسپانا كەزەگىندە تۇرعان وتباسىلار عانا قاتىسا الادى. نەگىزگى تالاپ - جوعارى، ورتا-ارناۋلى، كاسىپتىك-تەحنيكالىق ءبىلىمنىڭ بولۋى»، - دەيدى اكىمنىڭ ورىنباسارى.

ونىڭ سوزىنە قاراعاندا، «نۇرلى ەرتىس» باعدارلاماسىمەن ەكىباستۇزعا بۇگىندە 64 وتباسى قونىس اۋدارعان. جىل سوڭىنا دەيىن تاعى 58 وتباسىنى كوشىرۋ جوسپارلانعان.

«ەكىباستۇزعا كوشەتىن وتباسىلار ءۇشىن قابىلداۋشى تاراپ ولاردىڭ باسپانا جالداۋى ءۇشىن اي سايىن ءبىر جىل بويى 75 مىڭ تەڭگەگە دەيىن تولەيدى نەمەسە يپوتەكالىق نەسيە بويىنشا نەسيەنىڭ باستاپقى جارناسىن قۇيۋ ءۇشىن ءبىر رەت 900 مىڭ تەڭگە بەرەدى. قونىس اۋدارۋشى وتباسىلارعا كوشۋ شىعىندارى ءۇشىن 88375 تەڭگە مولشەرىندە بىررەتتىك كومەك بەرىلەدى»، - دەدى ەرلان كاناليموۆ.

باعدارلاما اياسىندا الماتى، تۇركىستان، جامبىل،  قىزىلوردا، ماڭعىستاۋ وبلىستارىندا دا جۇمىس ءجۇرىپ جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى