وسكەمەندە بالالار ۇيىنەن 63 ميلليون تەڭگە جىمقىرعان ديرەكتور مەن ەسەپشى سوتتالدى
قالالىق №2 سوتى باسپا ءسوز قىزمەتىنىڭ مالىمەتىنە سۇيەنسەك، 25 -اقپاندا اسا ءىرى مولشەردە بيۋدجەت قاراجاتىن جىمقىرعان بالالار ءۇيىنىڭ بۇرىنعى ديرەكتورى، باس ەسەپشى مەن كادر جۇمىسى ءبولىمىنىڭ ينسپەكتورىنا قاتىستى سوت ۇكىمى شىقتى.
«بەلگىلى بولعانداي، ولار الدىن الا ءسوز بايلاسىپ 2015 -جىلدىڭ ناۋرىزى مەن 2019 -جىلدىڭ قاڭتارى ارالىعىندا بالالاردىڭ قاجەتتىلىگىنە بولىنگەن 63150581 تەڭگەنى جالعان قۇجات جاساۋ ارقىلى قالتاعا باسقان. 2019 -جىلى باس ەسەپشى الەۋمەتتىك جەلىگە ۆيدەو جاريالاپ، ءوز ىسىنە وكىنىش ءبىلدىرىپ، قارجى جىمقىرۋ سحەماسىن اشكەرەلەگەن ەدى. الايدا ديرەكتور مەن كادر جۇمىسى ءبولىمىنىڭ ينسپەكتورى كىناسىن مويىندامادى»، - دەلىنگەن اقپاراتتا.
سوت ۇكىمى بويىنشا ءۇش ايىپتالۋشى دا ءومىر بويى مەملەكەتتىك قىزمەتتە جۇمىس ىستەۋ قۇقىعىنان ايىرىلىپ، 7 جىل مەرزىمگە تۇرمەگە قامالدى. ۇكىم ءالى زاڭدى كۇشىنە ەنگەن جوق.
اۆتور: تالعاتجان مۇحامەتبەك ۇلى
