مۇعالىمدەردىڭ جالاقىسىن كوتەرۋ ءۇشىن 62 ميلليارد تەڭگە بولىنەتىن بولدى
«سىزدەردىڭ نازارلارىڭىزعا اعىمداعى جىلعا ارنالعان رەسپۋبليكالىق بيۋجەتتى ناقتىلاۋ تۋرالى زاڭ جوباسى ۇسىنىلىپ وتىر. قۇجات مەملەكەت باسشىسىنىڭ قازاقستان حالقىنا جولداۋلارىندا جانە پرەزيدەنتتىڭ 5 الەۋمەتتىك باستامالارىندا بەرىلگەن تاپسىرمالارىن ىسكە اسىرۋعا باعىتتالعان. 2018-جىلعا ارنالعان رەسپۋبليكالىق بيۋجەتتىڭ بەكىتىلگەن كورسەتكىشتەرىن ناقتىلاۋعا ەلدىڭ وزگەرتىلگەن ماكروەكونوميكالىق كورسەتكىشتەر بولجامى نەگىز بولدى. وسىلايشا رەسپۋبليكالىق بيۋدجەت تۇسىمدەرى 81 ميلليارد تەڭگەگە ۇلعايتىلىپ، 8 تريلليون 759, 7 ميلليارد تەڭگەنى قۇرادى»، - دەدى زاڭ جوباسىن تانىستىرعان ق ر قارجى ءمينيسترى باقىت سۇلتانوۆ.
ءمينيستردىڭ ايتۋىنشا، 2018-جىلعا ارنالعان رەسپۋبليكالىق بيۋدجەت شىعىستارى 417 ميلليارد تەڭگەگەدەن 425 ميلليارد تەڭگەگە ۇلعايىپ، 9 تريلليون 643 ميلليارد تەڭگەنى قۇرايتىن بولادى. وسى قاراجات كولەمىنەن 292,5 ميلليارد تەڭگە مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جانە «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋلارىن ىسكە اسىرعا باعىتتالاتىن بولادى.
«ءبىرىنشى بلوك ادامي كاپيتال ساپاسىن جاقسارتۋعا 106 ميلليارد تەڭگە باعىتالاتىن بولادى. ونىڭ ىشىندە مۇعالىمدەردىڭ جالاقىسىن 30 دان 50 پايىزعا كوتەرۋگە 62 ميلليارد تەڭگە، نازاربايەۆ ۋنيۆەرسيتەتىن ودان ارى دامىتۋعا 31 ميلليارد تەڭگە، مۇگەدەكتەردىڭ كۇتىمىن جۇزەگە اسىراتىن ادامعا جاڭا جاردەماقى تولەۋگە 2,7 ميلليارد تەڭگە باعىتتالادى»، - دەدى باقىت سۇلتانوۆ.
ونىڭ دەرەگىنشە، ەكونوميكانىڭ ناقتى سەكتورلارى مەن ايماقتاردى دامىتۋعا 115 ميلليارد تەڭگە باعىتتاۋ ۇسىنىلادى. ونىڭ ىشىندە اۋىلدىق ەلدى مەكەندەردى اۋىز سۋمەن قامتاماسىز ەتۋگە قوسىمشا 31 ميلليارد تەڭگە بولىنەدى. مۇنان بولەك سالىنىپ جاتقان تۇرعىن ءۇي نىساندارىنا كوممۋنيكاتسيالىق ينفراقۇرىلىم تارتۋعا 31,5 ميلليارد تەڭگە، جەرگىلىكتى جولداردى جوندەۋگە 29 ميلليارد تەڭگە جانە اگروونەركاسىپ كەشەنىن كرەديت جانە ليزينگ بويىنشا پايىزدىق مولشەرلەمەلەردى سۋبسيديالاۋ، اگروعىلىمدى دامىتۋعا 15,6 ميلليارد تەڭگە باعىتتالادى. كيبەر قىلمىسپەن كۇرەس بويىنشا ءىس-شارالارعا 71 ميلليارد تەڭگە جۇمسالادى.
«پرەزيدەنتتىڭ 5 الەۋمەتتىك باستاماسى نەگىزىندەگى ءىس-شارالاردى ىسكە اسىرۋعا جانە 3, 4 باستامالارعا 25 ميلليارد تەڭگە باعىتتاۋ ۇسىنىلادى. ناقتى ايتقاندا، ءبىلىم بەرۋ تاپسىرىسىن 20 مىڭ گرانتقا ۇلعايتۋعا 5 ميلليارد تەڭگە، ميكروكرەديتتەۋدى 60 ميلليارد تەڭگەگە جەتكىزۋ ماقساتىندا قوسىمشا 20 ميلليارد تەڭگە باعىتتالاتىن بولادى. مۇنان باسقا بيۋجەت جوباسىندا پرەزيدەنتتىڭ تاپسىرمالارى مەن بۇرىن قابىلداعان مىندەتتەمەلەر بويىنشا جالپى سوماسى 99 ميلليارد تەڭگەنى قۇرايتىن شىعىستار ەسكەرىلدى»، - دەدى باقىت سۇلتانوۆ.
ءمينيستردىڭ سوزىنە قاراعاندا، اتالعان شىعىستار اياسىندا 25 ميلليارد تەڭگە استانانى، 11 ميلليارد تەڭگە الماتى قالالارىن ودان ارى دامىتۋ، اسكەري قىزمەتشىلەردى تۇرعىن ۇيمەن قامتاماسىز ەتۋ بويىنشا ءىس-شارلار مەن جوبالار قارجىلاندىرىلاتىن بولادى.
وسىدان كەيىن ۇكىمەت باسشىسى باقىتجان ساعىنتايەۆ 2018-جىلعا ارنالعان رەسپۋبليكالىق بيۋجەتتى ناقتىلاۋ تۋرالى زاڭ جوباسى ماقۇلداۋدى ۇسىنىپ، ونى مينيسترلەر كابينەتىنىڭ مۇشەلەرى قولدادى.
«پرەمەر-ءمينيستردىڭ كەڭسەسى قارجى مينيسترلىگىمەن بىرلەسىپ، ءتيىستى زاڭ جوباسىن 4- ساۋىردەن كەشەۋىلدەتپەي پارلامەنت قاراۋىنا ەنگىزەتىن بولسىن»، - دەپ تاپسىردى باقىتجان ساعىنتايەۆ.
اۆتور: مارلان جيەمباي
