ۋكراينالىق 62 جىلعا جۇرگىزۋشى قۇقىعىنان ايىرىلدى
ونى پوليتسيا 16 رەت ىشىمدىك ءىشىپ الىپ، كولىك جۇرگىزىپ جۇرگەن جەرىنەن ۇستاعان، دەپ حابارلايدى korrespondent.net ۋكراينانىڭ زاكارپات وبلىسىنا قاراستى مۋكاچەۆا قالاسىنىڭ وڭىرلىك ۇلتتىق پوليتسياسىنا سىلتەمە جاساپ.
قۇقىق قورعاۋ ورگانى وكىلدەرىنىڭ مالىمەتتەرىنشە، 2016 -جىلدىڭ تامىزىنان بەرى ولار ەر ازاماتقا قاتىستى 35 اكىمشىلك حاتتاما تولتىرعان. ولاردىڭ 16 سى كولىكتى ماس كۇيىندە جۇرگىزۋمەن بايلانىستى بولىپ وتىر.
وعان سونداي-اق وسىعان دەيىن 300 مىڭ گريۆەن ايىپپۇل سالىنعان. سونداي-اق اتالمىش ازامات بىرنەشە رەت قىلمىستىق قۇقىقبۇزۋشىلىققا جول بەرگەن. ولاردىڭ اراسىندا ەسىرتكى ساقتاۋ، قورشاعان ورتانى لاستاۋ، ۇرلىق سياقتى ارەكەتتەر بار. سوعان قاراماستان ازامات بىردە-ءبىر سوت وتىرىسىنا كەلمەگەن جانە ءىستى قاراۋدى كەيىنگە قالدىرۋ تۋرالى ءوتىنىش تە بەرمەگەن.
«وسى ۋاقىتتا اتالعان ازامات ەش جەردە جۇمىس ىستەمەيدى جانە ايىپپۇل دا تولەمەيدى. سوت ونىڭ كولىگىن دە تاركىلەي المايدى. ويتكەنى ول وزگە بىرەۋدىڭ اتىندا»، - دەپ مۇڭىن شاعادى پوليتسيا وكىلدەرى.
