وڭىردە تىلدەردى دامىتۋعا جىل سايىن 62 ميلليون تەڭگەدەن استام قارجى ءبولىنىپ كەلەدى - م. يحسانعالي
ب ق و تىلدەردى دامىتۋ باسقارماسىنىڭ باسشىسى ماحامبەت يحسانعاليدىڭ ايتۋىنشا، مىسالى، وسى ماقساتقا 2013 -جىلى 63775200 مىڭ تەڭگە قارالسا، وتكەن جىلى 62089000 مىڭ تەڭگە يگەرىلدى.
مەملەكەتتىك مەكەمەلەردىڭ قۇجات اينالىمىنداعى مەملەكەتتىك ءتىلدىڭ ۇلەسى 99,7 پايىزعا، وبلىس بويىنشا قازاق ءتىلىن بىلەتىن تۇرعىندار سانى 69 پايىزعا جەتىپ وتىر. جىل سايىن قازاق ءتىلىن وقىتۋ ءۇشىن كۋرستارعا 21 ميلليون تەڭگە ءبولىنىپ، 700 دەي ادام قامتىلادى. سونداي-اق اعىلشىن ءتىلىن ۇيرەنۋگە 13 ميلليون تەڭگە جۇمسالىپ كەلەدى.
وڭىردەگى كوشەلەر اتاۋلارىن بىرىزدەندىرۋ ماقساتىندا وبلىستىق ونوماستيكالىق كوميسسيانىڭ قاراۋىنا تۇسكەن جالپى سانى 731 كوشەگە جاڭا اتاۋلار بەرىلدى. سونداي-اق وبلىستىق بالالار كىتاپحاناسىنا ح. ەسەنجانوۆتىڭ ەسىمىن بەرۋ تۋرالى ۇسىنىس رەسپۋبليكالىق ونوماستيكالىق كوميسسيا شەشىمىمەن ماقۇلداندى. بۇل ماسەلەگە بيىلدان باستاپ موراتوري جاريالانعانىمەن، جەڭىستىڭ 70 جىلدىعىنا وراي ۇلى وتان سوعىسىندا ەرلىك كورسەتكەن مايدانگەرلەردىڭ ەسىمىن بەرۋگە مۇمكىندىك جاسالىپ وتىر.
سونىمەن قاتار قۇجات اينالىمداعى مەملەكەتتىك ءتىلدىڭ قولدانىسىن 100 پايىزعا جەتكىزۋگە كىرىس قۇجاتتارىنىڭ قاداعالانباۋى كەدەرگى كەلتىرىپ وتىرعانىن ايتپاي كەتۋگە بولمايدى. قر ۇكىمەتىنىڭ «مەملەكەتتىك ورگاندار گەربتىك بلانكىگە حاتتىڭ قازاقشا نۇسقاسىن رەسىمدەپ، ورىس تىلىندە كەلگەن نۇسقاسىن قابىلداماي، كەرى قايتارسىن» دەلىنگەن تاپسىرماسى ورىندالماي كەلەدى.
سونداي-اق ۇكىمەتتىك ەمەس ۇيىمدار مەن ءىرى كاسىپورىنداردىڭ، جالپى حالىققا قىزمەت كورسەتەتىن ءوندىرىس، بيزنەس سالالارىنداعى مەكەمەلەردىڭ ءىس قۇجاتتارىن مەملەكەتتىك تىلدە جۇزەگە اسىرۋىنا قول جەتكىزۋدە، مەملەكەتتىك مەكەمەلەردە جانە ءتۇرلى مەنشىك نىسانىنداعى مەكەمەلەردە بۋحالتەرلىك، قارجى- ستاتيستيكالىق، تەحنيكالىق قۇجاتتاردىڭ مەملەكەتتىك تىلدە جۇرگىزىلۋىنە ىقپال جاساپ، وسى باعىتتا كەشەندى جۇمىستار اتقارۋدا قولعا الاتىن شارۋالار بارشىلىق.
اۆتور: ەلجان ەرالى
