اتىراۋ تۇرعىنى 625 كەلى بەكىرەمەن ۇستالدى
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بالىق قورىنا قىلمىستىق قول سۇعۋشىلىقپەن كۇرەس ءبولىمىنىڭ قىزمەتكەرلەرى اسا ءىرى مولشەردە بەكىرە بالىعىن تاركىلەدى.
«14-قازانعا قاراعان ءتۇنى جايىق وزەنىنىڭ دامبا اۋىلى تۇسىندا ءبىرىنشى وزەكتە ءتارتىپ ساقشىلارى «Yamaha» اسپالى موتورى بار قايىقتى توقتاتتى. قايىقتان جالپى سالماعى 625 كەلى بولاتىن بەكىرە تۇقىمداس بالىقتاردىڭ 238 داناسى تابىلدى. وسى دەرەككە بايلانىستى جاڭاتالاپ ەلدى مەكەنىنىڭ 31 جاستاعى تۇرعىنى ۇستالدى. قازىر كۇدىكتىگە قاتىستى ق ر قىلمىستىق كودەكسىنىڭ 339-بابىمەن (وسىمدىكتەر مەن جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن تۇرلەرىمەن زاڭسىز اينالىسۋ) سوتقا دەيىنگى تەرگەۋ باستالدى»، - دەدى اتىراۋ وبلىستىق پوليتسيا دەپارتامەنتىنىڭ باستىعى قامزا ۇمبەتقاليەۆ.
ەسكە سالا كەتەلىك، بۇدان بۇرىن اتىراۋ وبلىسىندا Lada Priоrо- دان 75 كەلى بەكىرە تابىلعانىن حابارلاعان بولاتىنبىز.
