قازاقستان ازاماتتىعىن 622 ادام الادى
وتىرىستا قازاقستان ازاماتتىعىنا قابىلداۋ جانە ودان شىعارۋ ماسەلەلەرى قارالدى. شارا بارىسىندا مەملەكەتتىك حاتشى تاۋەلسىزدىك العان ساتتەن باستاپ قازاقستاننىڭ ازاماتى بولۋعا تالپىنۋشى ادامداردىڭ سانى ۇنەمى وسۋدە ەكەندىگىن اتاپ ءوتتى. بۇل فاكتى مەملەكەت باسشىسىنىڭ پاراساتتى باسشىلىعى ارقاسىندا جەتىلگەن ءبىزدىڭ ەلىمىزدىڭ الەۋمەتتىك- ەكونوميكالىق تۇراقتىلىعى، ۇلتارالىق جانە ازاماتتىق تاتۋلىعى مەن ورنىقتى دامۋىن كۋالاندىرادى.
«ءبىز رەسپۋبليكا تاۋەلسىزدىگىنىڭ 25 جىلدىعى قارساڭىندا ەلىمىزدىڭ جاڭا ازاماتتارىن قارسى الۋعا وتە قۋانىشتىمىز. ولارعا باقىتتى ءومىر جانە وتانىنىڭ يگىلىگى ءۇشىن تابىستى جۇمىس تىلەيمىز. ەگەمەن قازاقستاننىڭ لايىقتى ازاماتى بولا وتىرىپ، ونىڭ ءارى قاراي دامۋىنا ءوز ۇلەستەرىن قوساتىندىعىنا سەنەمىن»، - دەدى گۇلشارا ءابدىقالىقوۆا.
ايتا كەتەرلىگى، ق ر پرەزيدەنتى ءتيىستى جارلىققا قول قويعاننان كەيىن جاقىن جانە الىس شەتەلدەردەن كەلگەن ءار ءتۇرلى ۇلتتىڭ 622 وكىلى قازاقستان ازاماتى اتاناتىن بولادى. سونىمەن قاتار وتىرىس بارىسىندا ىشكى ىستەر مينيسترلىگىنىڭ قازاقستان ازاماتتىعىنا جەڭىلدەتىلگەن تارتىپپەن قابىلداۋ جانە ازاماتتىقتان ايىرۋ ماسەلەلەرى بويىنشا جۇمىس ناتيجەلەرى تالقىلاندى. قورىتىندىسىندا ءتيىستى شەشىمدەر مەن ۇسىنىمدار قابىلداندى.
اۆتور: مارلان جيەمباي
