بىلتىر قىتايدان كەلگەن تاۋارلاردان بيۋدجەتكە تۇسكەن تولەمدەر 60 پايىزعا ارتىق بولدى

بۇل تۋرالى ءماجىلىستىڭ جالپى وتىرىسىندا ۇكىمەتتىڭ 2022 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبىن قاراۋ كەزىندە پرەمەر- ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.

«جوعارى اۋديتورلىق پالاتا ەكسپورتتىق- يمپورتتىق ستاتيستيكاداعى الشاقتىق بويىنشا قابىلدانعان شارالاردىڭ جەتكىلىكسىز اسەرى تۋرالى اتاپ وتكەن. جالپى، الەمدىك تاجىريبەدە بارلىق ەلدە تاۋارلاردىڭ سىرتقى ساۋداسىنىڭ كەدەندىك ستاتيستيكاسى دەرەكتەرىندە سەرىكتەس ەلدەرمەن ارادا سايكەسسىزدىك بولىپ تۇرادى. بۇنداي الشاقتىقتىڭ نەگىزگى سەبەبى سىرتقى ساۋدا ستاتيستيكاسىن قالىپتاستىرۋدىڭ ادىستەمەلىك ەرەكشەلىگىندە. دەگەنمەن، الشاقتىقتى ازايتۋ ماقساتىندا جۇيەلى شارالار قابىلدانىپ جاتىر. تاۋارلارعا ارنالعان دەكلاراتسيالاردى باقىلاۋ جانە شىعارۋ ءۇشىن كەدەندىك فۋنكسيالاردى ورتالىقتاندىرۋ جۇزەگە اسىرىلدى»، - دەدى ە. جاماۋبايەۆ.

بۇل تۇرعىدا ول مەملەكەتتىك كىرىستەر كوميتەتى جانىنان باس ديسپەتچەرلىك باسقارما قۇرىلعانىن ايتتى. وسى قادام باقىلاۋ شارالارى بويىنشا ورتالىقتاندىرىلعان شەشىم قابىلداۋعا، وتكىزۋ پۋنكتتەرىندەگى جاعدايعا قاشىقتان مونيتورينگ جۇرگىزۋگە مۇمكىندىك بەرەدى.

«سونداي- اق، ەكسپورتتىق دەكلاراتسيالارمەن ونلاين تارتىپتە الماسۋ ءجۇرىپ جاتىر. ونداي اقپارات قىتاي حالىق رەسپۋبليكاسىنان قازاقستان اۋماعىنا تاۋارلار كەلمەي تۇرىپ جەتكىزىلەدى. بۇل كەلە جاتقان تاۋارلار تۋرالى الدىن الا اقپارات الۋعا مۇمكىندىك بەرەدى. ءتيىستى جۇمىستىڭ ناتيجەسىندە بىلتىر تەك قىتايدان كەلەتىن تاۋارلار بويىنشا بيۋدجەتكە 465 ميلليارد تەڭگەگە كەدەندىك تولەم مەن سالىق تۇسكەن. بۇل 2021 -جىلمەن سالىستىرعاندا % 60 ارتىق»، - دەدى قارجى ءمينيسترى.

اۆتور:

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى