كەڭساي زيراتىنداعى ورتتەن 60 مولاعا زالال كەلدى

بۇل تۋرالى الماتى قالاسى توتەنشە جاعدايلار دەپارتامەنتى باسشىسىنىڭ ورىنباسارى سامات اساينوۆ ءمالىم ەتتى، دەپ حابارلايدى قازاقپارات ءتىلشىسى.

«قازگيدرومەت» مەكەمەسىنىڭ داۋىلدى ەسكەرتۋىنە سايكەس الماتى قالاسىنىڭ ماڭىندا توتەنشە ءورت قاۋپى جاعدايى ساقتالادى. وسىعان بايلانىستى قالانىڭ ءورت ءسوندىرۋ قىزمەتى كۇشەيتىلگەن رەجيمدە جۇمىس ىستەپ جاتىر. كۇن سايىن پاترۋلدەۋ شاراسى ۇيىمداستىرىلادى. بارلىعى 19 ءورت ءسوندىرۋ بولىمشەسى جانە دەپارتامەنتتىڭ جەكە قۇرامىنىڭ 100 دەن استام مامانى دايىن»، - دەدى سامات اساينوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ت ج د باسشىسى ورىنباسارىنىڭ مالىمدەۋىنشە، وسى كۇنگە دەيىن جەرگىلىكتى اتقارۋشى ورگان وكىلدەرىمەن بىرلەسكەن 190 رەيد ۇيىمداستىرىلدى.

«رەيد بارىسىندا ءورت قاۋىپسىزدىگىن ساقتاماعان 117 ادام اكىمشىلىك جازاعا تارتىلدى. قازىر ءبىزدىڭ وڭىردە ءورت قاۋپى جاعدايى ساقتالىپ تۇر. وزدەرىڭىز بىلەتىندەي، كەشە تاۋ بوكتەرىندە 2 ءورت شىقتى، ياعني «كەڭساي» شاعىن اۋدانىندا 1 گەكتار قۇرعاق ءشوپ جاندى. ءتىلسىز جاۋدى اۋىزدىقتاۋعا جەل جانە ايماقتىڭ تاۋلى بولۋى كەدەرگى كەلتىردى. ءورتتىڭ سالدارىنان «كەڭساي» زيراتىندا 60 مولا زارداپ شەكتى. ودان بولەك، كوكتوبە ماڭىنان دا ءورت شىقتى. ماماندار ءتىلسىز جاۋدى 1 ساعاتتىڭ شاماسىندا اۋىزدىقتادى»، - دەيدى ول.

سونداي-اق، سپيكەر ءورت سالدارىنان ادام زاردابى مەن شىعىنىنىڭ بولماعانىن ايتتى.

ەسكە سالا كەتسەك، بۇعان دەيىن الماتىداعى تاۋ بوكتەرىندە قۋراعان ءشوپ ورتەنگەنى تۋرالى حابارلاعان ەدىك. ودان بولەك، كوكتوبەدە دە ءورت شىققان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى