استانا ماڭىنداعى قوياندى اۋىلىندا 60 تان استام شاعىن جانە ورتا بيزنەس سۋبەكتىلەرى اشىلدى

 بۇل تۋرالى ايماق باسشىسى سەرگەي كۋلاگيننىڭ وڭىرگە ساپارى بارىسىندا ايتىلدى، دەپ حابارلايدى «قازاقپارات» ح ا ا وڭىرلىك ءتىلشىسى.

اتالعان اۋدانعا ساپارى بارىسىندا ايماق باسشىسى قوياندى اۋىلىنداعى شاعىن جانە ورتا بيزنەستىڭ دامۋىمەن تانىستى.

 بۇگىنگى تاڭدا قوياندى اۋىلىندا 24 مىڭ ادام تۇراتىن بولسا، ونىڭ 70 پايىزدان استامى ورالماندار. وسى كۇنى ەلىمىزدە ءوز كاسىبىن اشىپ، دامىتامىن دەۋشىلەرگە مەملەكەت تاراپىنان بارلىق جاعداي جاسالعان. ماسەلەن، «وڭىرلەردى دامىتۋ» باعدارلاماسى بويىنشا ءبىر عانا وسى اۋىلدا 2011 -جىلدان بەرى 50 دەن اسا جوبا ماقۇلدانعان. اۋىلدا 1600 شاعىن جانە ورتا كاسىپكەرلىك سۋبەكتىلەرىنىڭ تىركەلۋى وسىنىڭ ايقىن دالەلى. سولاردىڭ ءبىرى - رايىمحان بوتاننىڭ وتباسى. «ءبىز وتباسىمىز بەن پەش جاسايمىز. كۇنىنە ءبىر پەش، ونىڭ باعاسى 250 مىڭ تەڭگە كولەمىندە. بۇل ءىستىڭ ءالى الدى عانا»، دەيدى رايىمحان.

وسىندا وتكەن جىلدار ىشىندە شەتتەن اتامەكەنگە ورالعان قانداستارىمىزبەن كەزدەسۋ بارىسىندا وبلىس باسشىسى كوشى- قون ماسەلەسى ۇكىمەت نازارىندا ەكەنىن ايتا كەلە، قوياندى اۋىلىندا اۋىز سۋ ماسەلەسىن شەشۋ ءۇشىن تەزىرەك جەرگىلىكتى جەردە جوبالىق- سمەتالىق قۇجاتتاما دايىنداۋ قاجەتتىگىن العا تارتتى.

 سونداي- اق، كۇن تارتىبىندە تۇرعان جول، ەلەكتر جارىعىمەن قامتاماسىز ەتۋ ءتارىزدى تۇيتكىلدى ماسەلەلەردىڭ دە الداعى ۋاقىتتا شەشىلەتىنىن جەتكىزدى. ءوز كەزەگىندە تۇرعىندار اتىنان ءسوز العان گۇلىسحان دومالاي قىزى استانانىڭ ىرگەسىندەگى ەلدى مەكەندەردە زاڭسىز جەر يەلەنۋدى توقتاتىپ، وسى ماسەلەنى تارتىپكە كەلتىرگەنى ءۇشىن وبلىس اكىمىنە العىسىن ءبىلدىردى.

اۆتور: اسلان وسپانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى