بيىلعى جىل قازاقستان شەتەل ماماندارىنا 60 مىڭنان استام ەڭبەك كۆوتا بەكىتتى

 بۇل تۋرالى استانادا قازاقستان رەسپۋبليكاسىنىڭ باس مەملەكەتتىك ەڭبەك ينسپەكتورى اقمادي سارباسوۆ ءمالىم ەتتى.

«سىرتقى ەڭبەك كوشى- قونىنا توقتالاتىن بولساق، بۇل تۇرعىدا رەتتەۋ جۇرگىزەتىن نەگىزگى تەتىك رەتىندە كۆوتا مەن رۇقساتناما بەرۋ جۇيەسى ساقتالادى. وسى ورايدا ءبىز بولەك سالالاردان وزگە وسى جۇيەدەن باس تارتۋدى كوزدەپ وتىرعانىمىز جوق. ەڭبەك نارىعىن قورعاۋ ماقساتىندا بىزدەگى جۇيە كۆوتالانعان. 2016 -جىلعا 63 مىڭ ادامعا كۆوتا بەكىتتىك، بۇل ەكونوميكالىق بەلسەندى حالىقتىڭ 0,7 پايىزى»، - دەدى ا. سارباسوۆ «كوشى- قوننىڭ الەۋمەتتىك- ەكونوميكالىق اسەرلەرى: ميگرانتتاردىڭ قورعانسىزدىعى جانە ورتالىق ازياداعى ينتەگراتسيالىق قاجەتتىلىكتەر» اتتى دوڭگەلەك ۇستەلدە.

ونىڭ سوزىنە قاراعاندا، بۇل ەكونوميكاعا بىلىكتى شەتەل ماماندارىن تارتۋدىڭ جوعارى شەگى جانە جەتكىلىكتى دەڭگەيى بولىپ تابىلادى.

 ا. سارباسوۆتىڭ ايتۋىنشا، سونىمەن قاتار ول ءۇي شارۋاشىلىقتارىنا جۇمىس ىستەۋ ءۇشىن تەك ت م د ازاماتتارىنا رۇقساتناما بەرۋ جۇيەسى بار. بۇل تۇرعىدا ءوسىم بار كورىنەدى. 2015 -جىلى ت م د ازاماتتارى ءۇشىن 141 مىڭ رۇقسات بەرىلگەن ەكەن.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى