نۇرلى ءبىلىم ۇيىمى تەرىس ءدىني اعىمعا ەرگەن 60 ادامدى قالاي قايتاردى؟
بۇل تۋرالى بۇگىن «ءدىن سالاسىنداعى وزەكتى ماسەلەلەردى جاريالاۋ جونىندەگى اقپاراتتىق جۇمىستىڭ قاعيدالارى مەن باسىمدىقتارى» اتتى ءدىن سالاسىنداعى ماسەلەلەردى ب ا ق- تا جاريالاۋ بويىنشا جۋرناليستەرگە ارنالعان ترەنينگ بارىسىندا قوعامدىق بىرلەستىكتىڭ ءتوراعاسى رۇستەم سىزدىقوۆ ءمالىم ەتتى.
«وكىنىشكە قاراي، سيرياعا، يراكقا راديكال بولىپ قارىنداستارىمىز بەن باۋىرلارىمىز بىلمەستىكپەن كەتىپ جاتىر. بارلىق قاتەلىك ءدىن تۋرالى عىلىمي ءبىلىمنىڭ جوقتىعىنان ەكەنىن ناقتى ءتۇسىندىرۋىمىز كەرەك. ءبىزدىڭ «نۇرلى ءبىلىم» ۇيىمى 2013 -جىلدان بەرى جۇمىس اتقارىپ كەلەدى. اداسقان اعىمداردىڭ وكىلدەرىن ءوزىمىزدىڭ ءداستۇرلى باعىتقا قايتارۋ ماقساتىنداعى جۇمىستىڭ قورىتىندىسىن ايتاتىن بولسام، تەرىس اعىمعا قوسىلعان 60 قا جۋىق ادامدى قايتاردىق»، - دەگەن ر. سىزدىقوۆ تەرىس اعىمعا كەتكەن ادامداردى جامانداۋ، جالا جابۋ ەشقاشان ەشقانداي ناتيجە بەرمەيتىنىن باسا ايتتى.
ونىڭ ايتۋىنشا، مۇنداي ادامداردىڭ قاتەلىگىن تەك قانا عىلىمي فورماتتا دالەلدەۋ كەرەك. ولاردىڭ سىرتىنان جامان ءسوز ايتىپ، بالاعاتتاۋ ەشقانداي ناتيجە بەرمەيدى.
«مەملەكەت باسشىسى ايتقانداي، ءبىز ءدىني سانانى قالىپتاستىرۋىمىز كەرەك. ءدىني تاجىريبە دەگەن نارسە بار، ءدىني سانا دەگەن نارسە بار. ءدىني تاجىريبە دەگەنىمىز - مەشىتكە بارۋعا، ورازا ۇستاۋعا، ورامال تاعۋعا شاقىرۋ. ال زايىرلى مەملەكەتتە، پليۋاريستىك قوعامدا ءبىز تەك ءدىني سانانى قالىپتاستىرۋمەن اينالىسىپ جاتىرمىز. ءدىني سانانى قالىپتاستىرۋدا حالىققا قانداي اقپارات بەرۋىمىز كەرەك دەگەن سۇراق تۋىندايدى. ءبىز اراب الەمىنىڭ، يسلام عالىمدارىنىڭ اتىن ايتىپ جاتقان جوقپىز، زايىرلى قوعامعا ول كەرەك تە ەمەس. نەگىزگى ماسەلە - اباي مەن شاكارىم، ۇلتتىڭ تەڭدەسى جوق ۇلى تۇلعالارى، ۇلتتىڭ تۇڭعىش ۇستازى ىبىراي التىنساريننىڭ ءسىز بەن بىزگە اللانى قالاي تانۋ كەرەك، يمان دەگەن نە، كۇپىرلىك دەگەننىڭ نە ەكەنىن ايتىپ كەتكەن. وسىنى ءبىز ءاربىر قوعامداعى ساناعا جەتكىزەتىن بولساق، بۇل ناقتى يممۋنيتەت بولادى»، - دەيدى ول.
بۇل رەتتە، ر. سىزدىقوۆ ب ا ق وكىلدەرى تاراپىنان كەتەتىن بىرنەشە قاتەلىكتى اتاپ كورسەتتى.
«ءبىز زايىرلى مەملەكەت بولعانىمىزبەن، پليۋاريستىك قوعامبىز. بۇل قوعامدا ناماز وقيتىن مۇسىلماندار، ناماز وقىمايتىن مۇسىلماندار، ءتىپتى، حريستياندار مەن اتەيستەر دە بىردەي. بۇل نەگىزى ارداقتى پايعامبارىمىز مۇحاممەدتىڭ (س. ا. س) قالدىرعان نەگىزگى وسيەتتەرىنە ساي كەلەدى. مەدينەدەگى ەڭ تۇڭعىش كونستيتۋتسيانىڭ 64 -بابىندا پايعامبارىمىز تۇڭعىش يسلام مەملەكەتى تۋرالى ايتا وتىرىپ، ەشبىر حريستيانعا، ەشبىر ءدىن وكىلىنە ەشقاشان قىسىم كورسەتپەپ ەدى. ولاردى الالاعان جوق. سونى ءبىز ءتۇسىنىۋمىز كەرەك. سودان كەيىن كەيبىر بۇقارالىق اقپارات قۇرالدارىنىڭ وكىلدەرى «ءدىندار مۇسىلمان»، «ءدىنسىز مۇسىلمان» دەپ جازادى دا، ايتادى دا. بۇنداي تەرمين مۇلدە بولمايدى، بۇل ۇعىم ءبىر-بىرىنە قارسى بولىپ تۇرعان تۇسىنىك»، - دەدى ول.
اۆتور: كەنجەكەي توقتامۇرات قىزى
