ەلىمىزدەگى مەملەكەتكە تيەسىلى 60 ءىرى كومپانيا ساتىلىمعا شىعارىلماق
بۇعان دەيىن مەملەكەتكە تيەسىلى بولىپ كەلگەن 60 ءىرى كومپانيا ساتىلىمعا شىعارىلادى دەپ حابارلايدى «استانا» ارناسى.
وسى ارقىلى قازىنا قارجىسى تولىعادى، الپاۋىت تابىس يەلەرى مۇلكىن ارتتىرا تۇسەدى. بۇعان دەيىن مەملەكەتكە تيەسىلى بولىپ كەلگەن، ەندىگى جەردە ساتىلىمعا شىعارىلاتىن كومپانيالاردى 60 ءىرى نىسان باستاپ تۇر. اۋكتسيونعا شىعاتىن دۇنيە-مۇلىكتەردىڭ اراسىندا ءتىپتى اۋەجايعا دەيىن بار.
جالپى 2020-جىلعا دەيىن ءىرىلى-ۇساقتى مىڭنان استام نىساندى مەملەكەت مەنشىگىنەن جەكەمەنشىككە وتكىزۋ جوسپارلانعان. جاپپاي جەكەشەلەندىرۋ ناۋقانىنان سوڭ كەيبىر كومپانيالار تاراپ كەتۋى دە مۇمكىن.
ۆيتسە-پرەمەر باستاعان توپ ەكونوميكاعا قاتىستى ۇكىمەت ۇيىندە قابىلدانعان كەزەكتى ماڭىزدى شەشىمدى اقپارات قۇرالدارى ارقىلى ەل-جۇرتقا ەستىرتۋگە اسىقتى. جەكەشەلەندىرۋ تىزىمىنە ىلىككەن، 2020- جىلعا دەيىن مەملەكەت مەنشىگىنەن شىعارىلۋى ءتيىس 800 گە جۋىق كومپانيا قاتارىن بيىل قۇنى 5 ميلليارد تەڭگەدەن اساتىن تاعى 60 ءىرى كومپانيا تولىقتىردى.
«38 ءى «سامۇرىق-قازىنا» ۇلتتىق حولدينگىنە، ءتورت تورتتەن «قازاگرو» مەن «بايتەرەككە» تيەسىلى، 14 ءى مەملەكەتتىك مەنشىكتەگى ءىرى مەكەمەلەر، ولاردىڭ ىشىندە ايروپارتتار دا بار، فارماتسيا، «كازاۆتودور» دەگەن سياقتى ءىرى كاسىپورىندار»، - دەيدى قارجى ءمينيسترى باقىت سۇلتانوۆ.
ۇكىمەت ەكى رەت ساۋدالانىپ، وتپەگەن نىسانداردى تاراتىپ جىبەرمەك
جەكەشەندىرۋدىڭ ەكىنشى تولقىنى اياسىندا بىلتىر 379 نىسان ساۋداعا شىعارىلىپ، ونىڭ 205 ءى ساتىلعان. 175 ءىنىڭ «ءالى ساۋداسى كەلمەي» جاتىر. ۆيتسە-پرەمەردىڭ ايتۋىنشا، ولاردى يەلەنۋگە قۇلشىنىپ وتىرعان ادام جوق كورىنەدى. تابىس اكەلەرىنە كۇماندانسا كەرەك. نەمەسە جۇرەكتەرى داۋالامايدى. ويتكەنى ول نىساندار جۇمىس باعىتىن وزگەرتپەۋى ءتيىس. بىلتىردان بەرى وسىنداي كومپانيالار بىرنەشە اينالىممەن اۋكتسيونعا شىعارىلعان. ەندى ۇكىمەت ەكى رەت ساۋدالانىپ، وتپەگەن نىسانداردى تاراتىپ جىبەرمەك.
«كونسەرت زالدارى، سپورت الاڭدارى، بولماسا اقپارات قۇرالادارى، بيزنەسكە پايداسى جوق، شىعىننان باسقا. نەگىزى قىزىعۋشىلىق تانىتاتىن نىساندار سىرتتا قالىپ قويىپ جاتتى. قازىرگى ايتىپ وتىرعانىمىز وسى بيزنەسكە قاجەتتى نىساندار»، - دەدى پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ.
تابىسى مول 60 ءىرى كومپانيانى قالتالىلار بىردەن قاعىپ الادى
جەكە قولعا ساتۋ جايلى ماسەلە كوتەرىلگەندە، داۋ تۋعىزعان ستراتەگيالىق نىساننىڭ ءبىرى - قاپشاعاي سۋ ەلەكتر ستانسياسى-تىن. جەكەمەنشىك يەسى تاريفتى ءوسىرىپ جىبەرەدى دەپ قاۋىپتەنگەن الماتىنىڭ ەكس-اكىمى ۇكىمەتكە حات تا جولداعان. كەيىن گ ە س «سامۇرىق-ەنەرگو» قاراماعىنا وتەدى دەگەن اقپار تارادى. ءبىراق نىساننىڭ تاعدىرى ءالى دە قىل ۇستىندە تۇرعانعا ۇقسايدى.
سونداي-اق، قۇنى 5 ميللياردقا جەتپەيتىن تاعى 161 نىسان مەملەكەت مەنشىگىنەن شىعارىلماق. 74 مىڭ ادامدى جۇمىسپەن قامتىپ وتىرعان بۇل كومپانيالاردىڭ جالپى قۇنى 290 ميلليارد تەڭگەنى قۇرايدى. 13- قازانعا دەيىن ناقتى ءتىزىم بەلگىلى بولماق. ۇكىمەتتەگىلەردىڭ ايتۋىنشا، تابىسى مول 60 ءىرى كومپانيانى قالتالىلار بىردەن قاعىپ الادى.
نارىقتاعى تەربەلىستەردى ەسكەرسەك، شەت ەلدىك ينۆەستورلاردىڭ جەتىپ كەلۋى ەكىتالاي. سوندىقتان قۇيقالى كومپانيالار وتاندىق بيزنەس بوموندقا بۇيىرۋى بەك مۇمكىن. ەسەسىنە، ەكى اينالىمدا دا ساتىلماي قالعان ورتاڭعول كومپانيالار تاراپ تىنباق.
