كامەلەتكە تولماعان قىزعا 600 مىڭ تەڭگە قالىڭمال بەرىلگەن وقيعاعا قاتىستى تىڭ دەرەك شىقتى
بۇل وقيعا تۋرالى «نەمولچي كز» قورىنا شىمكەنت تۇرعىنى ايتىپ بەرگەن.
باۋىرجان ءماسىموۆتىڭ ايتۋىنشا، 15 جاستاعى قىزىن جەتىساي اۋدانىنا اپارىپ، تانىمايتىن اداممەن بەتاشار ءراسىمىن وتكىزگەن. ءوتىنىش بەرۋشىنىڭ ايتۋىنشا، كەيىنىرەك بۇرىنعى ايەلى بۇل پرانك ەكەنىن ايتقان.
قىزدىڭ اكەسى بۇل تۋرالى الەۋمەتتىك جەلىلەردەن بىلگەن. اكەسى كۇيەۋ جىگىتتىڭ مەكتەپ وقۋشىسىن الىپ قاشقانىن، ال اناسىنا قالىڭ مالعا 600 مىڭ تەڭگە تولەنگەنىن ايتادى. اكەسى قۇقىق قورعاۋ ورگاندارىنا ارىز بەرگەن. ەر ادام قىزىن ۇرلاپ اكەتكەندەردى زاڭ بويىنشا جازالاۋدى سۇراپ وتىر. باۋىرجان ءماسىموۆتىڭ سوزىنشە، قىز اناسىمەن بىرگە بولەك تۇرادى، ءبىراق اليمەنت تولەيدى.
«قازىر قىزىم بۇرىنعى جۇبايىمنىڭ ۇيىندە. ونى زورلادى ما، جوق پا، بىلمەيمىن. جەتىسايداعى پوليتسياعا ارىز جازدىم، سەبەبى قىزىمدى جەتىسايلىق جىگىت الىپ قاشقان. ارىزدان كەيىن بۇرىنعى جۇبايىم پرانك ەكەنىن ايتتى. ەندى پوليتسەيلەر بۇل ءىس پرانك بولعاندىقتان توقتاتقىسى كەلەدى. بۇرىنعى ايەلىمە قىزىما وسىلاي جاساۋ ءۇشىن نە جەتپەگەنىن بىلمەيمىن. وعان ءۇي دە، اقشا دا بەردىم»، - دەيدى شىمكەنتتىك باۋىرجان ءماسىموۆ.
قۇقىق قورعاۋ ورگاندارى ەشكىم قىزدى كۇشتەپ ۇستاماعانىن، كامەلەتكە تولماعان قىز ءوزى جاقسى بىلەتىن ادامعا تۇرمىسقا شىعۋعا شەشىم قابىلداعانىن مالىمدەپ وتىر.
«قىزدى ۇرلاۋ جانە ماجبۇرلەپ ۇستاۋ دەرەكتەرى راستالمادى. قىز بەن جىگىت بۇرىننان تانىس جانە بىرگە ءومىر ءسۇرۋدى جوسپارلاپ وتىرعانى بەلگىلى بولدى. قازىر قىلمىستىق ءىس قىلمىستىق كودەكستىڭ 122-بابى بويىنشا تەرگەلىپ جاتىر»، - دەيدى تۇركىستان وبلىسى پ د باسپا ءسوز حاتشىسى گۇلنار ءابدىجاپپاروۆا.
باۋىرجان ءماسىموۆ كامەلەتكە تولماعان قىزىنا قاتىستى ءىستى ەرەكشە باقىلاۋىنا الۋ ءۇشىن باس پروكۋراتۋراعا جۇگىنۋگە نيەتتى. قازىر 15 جاستاعى قىز شىمكەنتتە اناسىمەن بىرگە تۇرادى.
