تارباعاتاي تاۋىندا 600 گە جۋىق ارقار بارى انىقتالدى
وعان ۇكىمەت قاۋلىسىمەن بىلتىر قۇرىلعان مەملەكەتتىك ۇلتتىق پاركتىڭ 100 گە تارتا مامانى قاتىسىپ، سوڭعى تەحنيكا جەتىستىكتەرىن پايدالاندى.
الدىن الا مالىمەت بويىنشا، تاۋدىڭ كۇنگەيى مەن تەرىسكەيىندە 600-گە جۋىق ارقار، 20 شاقتى قوڭىر ايۋ مەن سىلەۋسىن بار. ارنانىڭ تىلشىلەرى دە ساناققا قاتىسىپ، ساي- سالا، قۇز بەن شاتقالدى شارلاپ قايتتى.
بولات كوكەناي ۇلى، ءتىلشى:
- ارقارلار جايىلىمىنا جەتۋ وڭاي دەپ كىم ايتتى؟ ءدال قازىر قاراباس تاۋىنداعى «اڭشىمان» شاتقالىنا كەلىپ جەتتىك. بۇدان ءارى قاراي تەمىر تۇلپارلار جۇرەتىن جول جوق. سوندىقتان ءبىزدى مەملەكەتتىك ينسپەكتورلار اتپەن توسىپ تۇر. تەڭىز دەڭگەيىنەن ءبىر جارىم مىڭ مەتر بيىكتىكتەگى قاراباس تاۋى تارباعاتايدان ءسال تومەنىرەك ورنالاسقان. ادەتتە ارقارلار مۇندا قازان ايىندا قونىس تەبەدى. وسىندا قىستاپ، كوكتەمدە تولدەپ، قايتادان تارباعاتايعا كوشەدى.
ۇلتتىق پارك اشىلعالى بەرى قىزىل كىتاپقا ەنگەن جانۋارلار وزدەرىن ەمىن- ەركىن سەزىنە باستاعان. 9 باعىتتا جۇرگىزىلگەن ساناققا ۇلتتىق پاركتىڭ 100 گە تارتا مامانى قاتىسىپ، 105 شاقىرىم جول ءجۇرىپ وتكەن.
الىبەك توقىمتايەۆ، «تارباعاتاي» مەملەكەتتىك ۇلتتىق پاركىنىڭ ديرەكتورى:
- درون ۇشىرامىز، سونىمەن باقىلايمىز جوعارىدان. جانە فوتوتۇزاق قويىپ جاتىرمىز، سولاردىڭ كومەگىمەن جانە باسقا دا مەتوديكامەن انىقتاپ، ساناقتىڭ قورتىندىسى بويىنشا وسى 8 مىڭ گەكتار جەردىڭ اۋماعىندا 250-270 ارقار، ەكى جاعىن قوسقاندا 500-600 ارقار بار دەپ ويلايمىز. ايۋ ساناعى قالدى، سول بىتكەننەن كەيىن قورتىندىلاپ، ءساۋىر ايىندا قورىتىندى ەسەبىن بەرەمىز.
قىتايمەن شەكارادا، وبلىس ورتالىعىنان 700 شاقىرىمداي جەردە ورنالاسقان بۇل ولكەنىڭ بۇعىپ جاتقان قۇپيا سىرى كوپ. تاڭبالى تاستار، قار ادامى تۋرالى اڭىزدار سونىڭ ءبىر شەتى عانا. قازىر عىلىمي اقپارات جانە مونيتورينگ ءبولىمى ماڭىزدى مالىمەتتەردى جان- جاقتى زەردەلەۋگە كىرىسكەن.
جاڭىلحان الىمسەيىتوۆا، «تارباعاتاي» مەملەكەتتىك ۇلتتىق پاركىنىڭ ءبولىم جەتەكشىسى:
- بۇرىنعى اتا- بابالارىمىز، وسى وڭىردە ءومىر ءسۇرىپ جاتقان قارت كىسىلەردىڭ دەرەكتەرىن جيناقتاۋ ارقىلى ءبىز قار بارىسى وسى جەردە مەكەن ەتكەن ەكەن دەگەن تۇجىرىمدى ايتىپ وتىر. جانە ونىمەن قوسا مىنە تاڭبالى تاستان بىرنەشە پەتروگليفتەر كوردىك، مۇنداعى بۇرىنعى سالىنعان تاۋەشكى سۋرەتى، ياعني قار بارىسى مەكەن ەتكەن جەردە تاۋ ەشكىسى دە كەزەدەسەدى دەگەن ءسوز. نەگىزگى باستى جۇمىسىمىز - ءوزىمىزدىڭ بايلىعىمىزدى ساقتاپ، ونىڭ سانىن ءوسىمى بولسا ونى ءبىلۋ.
سيرەپ بارا جاتقانداردىڭ قاتارىن مۇلدەم جويىلىپ كەتۋگە جول بەرمەۋ. ارقار، ايۋ، سىلەۋسىننەن وزگە مارال، ەلىك، قابان، بۇلان سياقتى جانۋارلار ساناققا الىنسا، قۇستاردان قۇر، قىرعاۋىل، كەكىلىك، ءشىل تىركەلدى. بۇل كەشەندى جۇمىستار الداعى ۋاقىتتا دا جالعاسىن تابا بەرەدى. ال جاز كەزىندە تارباعاتاي تاۋىنا تۋريستەر تارتۋ ءۇشىن بىرنەشە جوبانى جۇزەگە اسىرۋ كوزدەلىپ وتىر.
www.24.kz
