رەسەيدە وتەتىن الەمدىك دوپ دوداسىنا 600 مىڭ جانكۇيەر كەلەدى دەپ كۇتىلۋدە
11 قالادا ورنالاسقان سپورت نىساندارىندا سىناق جارىستارى ءوتىپ، ستاديونداردىڭ ازىرلىگى پىسىقتالدى. ۇيىمداستىرۋشىلار قاۋىپسىزدىك ماسەلەسى دە باستى نازاردا ەكەنىن ايتادى.
رەسەي فۋتبولدان الەم چەمپيوناتىن قابىلداعان 17 ەلدىڭ قاتارىنا كىردى. ورىستار دۇنيە ءجۇزىنىڭ ايتۋلى جارىسىنا جەتى جىل دايىندالدى. ەندى مىنە ۇيىمداستىرۋشىلار رەسەي الەم كۋبوگىنا تولىق ءازىر ەكەنىن رەسمي مالىمدەدى.
سەرگەي الەكسەيەۆ، ر ف زاڭگەرلەر قاۋىمداستىعىنىڭ سپورتتىق قۇقىق جونىندەگى كوميسسياسىنىڭ باسشىسى:
- قاۋىپسىزدىكتى قاداعالاۋعا ۇلتتىق گۆارديا مەن بارلىق قۇقىق قورعاۋ ورگاندارىنىڭ قىزمەتكەرلەرى جۇمىلدىرىلدى. 20 مىڭنان استام ادام ارنايى دايىندىقتان ءوتىپ، باقىلاۋ- وتكىزۋ جۇمىستارىنا تارتىلدى. ىشكى ىستەر مينيسترلىگىندە سپور پوليتسياسى اتتى جەكە دەپارتامەنت قۇرىلدى. ولار الەم چەمپيوناتى كەزىندە ءتارتىپ پەن قاۋىپسىزدىكتى قاداعالاۋمەن اينالىسادى.
ۆالەري گاززايەۆ، رف مەملەكەتتىك دۋماسىنىڭ سپورت، جاستار ءىسى جونىندەگى كوميتەتىنىڭ باسشىسى:
- فرانسياداعى ەۋروپا چەمپيوناتى كەزىندەگى جاعدايلار قايتالانبايدى. ەكى كوماندانىڭ جانكۇيەرلەرى بولەك سەكتورلارعا جىبەرىلەدى. بۇل جۇمىستار جوعارى دەڭگەيدە ءجۇرىپ جاتىر. ءبىزدىڭ قاۋىپسىزدىك قىزمەتىنىڭ ماماندارى الەم چەمپيوناتىنا قاتىساتىن ەلدەردىڭ قاۋىپسىزدىككە جاۋاپتى ورگاندارىمەن تىعىس قارىم- قاتىناس ورناتتى. قاۋىپسىزدىكتى ساقتاۋ ماقساتىندا ماتچتار وتەتىن قالالارعا كىرۋ ءتارتىبى قاتاڭداتىلدى.
ەندى كەلۋشىلەر جەرگىلىكتى مەكەنگە ءۇش كۇنگە تىركەلۋى كەرەك. بۇل تالاپ فۋتبول جانكۇيەرلەرى مەن شەتەلدىك ازاماتتارعا دا قاتىستى. رەسەيلىكتەر قاتاڭ تەكسەرىس پەن شەكتەۋلەرگە قاراماستان الەم چەمپيوناتى كوپشىلىكتىڭ ەسىندە ۇلكەن فۋتبول مەرەكەسى رەتىندە قالسا دەيدى.
اندرەي كۋتەپوۆ، فەدەراتسيا كەڭەسىنىڭ رەگلامەنت جونىندەگى كوميتەتىنىڭ باسشىسى:
- ءبىز جوعارى دەڭگەيدە دايىندالدىق. ينفراقۇرىلىم بار. كەلۋشىلەردى قارسى الاتىن ماماندار دا ازىرلىكتەن ءوتتى. ءبىز بۇل مەرەكەنى قارسى الىپ، كوپپەن بىرگە تويلاۋعا ىشتەي ءازىرمىز. بۇكىل الەم حالقىنا قوناقجاي ەكەنىمىزدى كورسەتەمىز.
رەسەيدى مەرەكە عانا ەمەس، ۇلكەن سىناق تا كۇتىپ تۇر. ەلدىڭ كەيبىر ايماقتارى ءبىر جىلدا كەلەتىن تۋريستەردى ءبىر ايدىڭ ىشىندە قابىلداپ ۇلگەرۋى كەرەك. الەمدىك دوپ دوداسىنا التى ءجۇز مىڭ جانكۇيەر كەلەتىن كورىنەدى.
www.24.kz
