اۋە قاتىناسىمەن قازاقستان ارقىلى وتەتىن جولاۋشىلار 600 مىڭعا جەتەدى - جەڭىس قاسىمبەك
2010 -جىلى اتالعان كورسەتكىش 20 مىڭ بولسا، وتكەن جىلى 478 مىڭ ادامعا جەتتى، دەپ حابارلايدى قازاقپارات ءتىلشىسى.
ق ر ينۆەستيتسيالار جانە دامۋ ءمينيسترى جەڭىس قاسىمبەكتىڭ ايتۋىنشا، قازاقستان ارقىلى قىتايلىقتار ەۋروپاعا، رەسەي مەن تۇركياعا ءجيى بارىپ جۇرەدى. بۇدان بولەك، ەۋروپادان ءۇندىستانعا، ۋكراينادان وزبەكستانعا، قىرعىزستاننان وڭتۇستىك كورەياعا بارىپ جۇرگەندەردىڭ سانى ارتىپ كەلەدى.
«جىلدىڭ اياعىنا دەيىن قازاقستان ارقىلى وتەتىن اۋە قاتىناسىمەن وتەتىن ترانزيتتىك جولاۋشىلاردىڭ جالپى سانى 600 مىڭعا جەتەدى دەگەن بولجام بار. ال 2020 -جىلعا دەيىن 1,6 ميلليونعا جەتەدى. «ەير استانانىڭ» مالىمەتى بويىنشا ءبىر ترانزيتتىك جولاۋشى قازاقستاندا 250 دوللارداي قالدىرىپ كەتەدى. ونىڭ ىشىندە قوناق ءۇي، تاماقتانۋ جانە تاعى باسقا شىعىندارى بار»، - دەدى جەڭىس قاسىمبەك ۇكىمەتتىڭ بۇگىنگى وتىرىسىندا.
ءمينيستردىڭ سوزىنە قاراعاندا، بۇگىندە ەكسپو اياسىندا قىتاي حالىق رەسپۋبليكاسىنىڭ ازاماتتارى ءۇشىن 72 ساعاتقا دەيىن ۆيزاسىز رەجيم پيلوتتىق جوبا رەتىندە قولعا الىندى. سونداي- اق، كورمە كەزىندە ەۋروپالىق وداق، ەكونوميكالىق ىنتىماقتاستىق جانە دامۋ ۇيىمى جانە باسقا دا مەملەكەتتەر ءۇشىن ەنگىزىلگەن ۆيزاسىز رەجيمنىڭ ارقاسىندا تۋريستەردىڭ سانى ارتىپ وتىر.
«ەكسپو اياسىندا استانادا اشىق اسپان جۇيەسى ەنگىزىلدى. ول دا - پيلوتتىق جوبا. شەتەلدىك كومپانيالار ءۇشىن بارلىق شەكتەۋلەردى الىپ تاستادى. جىل باسىنان بەرى استانادان توعىز جاڭا حالىقارالىق رەيس اشىلدى. وسى ورايدا ءبىز قازىرگى تاجىريبەنى جالعاستىرىپ، كەلەسى جىلى دا استانا ءۇشىن «اشىق اسپان» پرينتسيپىن ساقتاۋدى ۇسىنامىز»، - دەپ اتاپ كورسەتتى جەڭىس قاسىمبەك.
ايتا كەتەيىك، وتىرىس بارىسىندا مينيستر كەلەسى جىلدان باستاپ ازاماتتىق اۆياتسيا وتاندىق كەروسينمەن تولىعىمەن قامتاماسىز ەتىلەتىنىن جەتكىزدى.
اۆتور: ارمان اسقاروۆ
